SHILLONG: Ma·mong sorkarini dongimin nisan gitan Meghalaya a·dokoba Jal Jeevan Mission (JJM)-ni kamrangko 2024 bilsio matchotatgen ine Sonibar salo, a·dokni Chief Minister Conrad K Sangma, an·tangni ka·dongsoenganiko parakataha.
“Chinga 2022 bilsion JJM-ko matchotatna miksongachim indiba dingtang dingtang neng·nikanirang dongani a·sel matchotatna man·jaha. Chinga chingni nisanoni 50 percent-ko matchotatna man·ahaoba India sorkarini dongimin somoi gitan matchotatna ku·rachakaniko on·enga,” ine Mawlai-o Um Shillong-Lummawnei, Umthlong, Mawiong aro Block 13 Water Supply Scheme-na pangchakaniko songe on·angani somoio Chief Minister parakataha.
Ia Water Supply Scheme-na Jal Jeevan Mission-ni ning·o gong kror 95.38 tangkarangko chamsoahachim ine nikna man·a.
2019 bilsio Meghalaya a·dokni 75 percent nokdangrangsan chi pipe-rangko soke man·kuengani gimin Meghalaya a·dokan ja·manchakbatsranggipa ong·kuengachim ine janapatengon, da·alo chi pipe-rangko sale on·anio Meghalaya a·dokba nambatsranggipa a·dokrangoni damsa ong·paengaha aro iako Union Jal Shakti Minister an·tangan ku·rachakaha ine Sangma parakataha.
Kamrangni a·sel Meghalaya a·dok bilsignina joljol tangka paisarangko man·dapaha ineba Chief Minister parakataha.
“Ian kamrangko ka·enggipa dolni rakbee kam ka·ani sakkirang ong·a,” ine Sangma aganaha.
Ia tom·anio dongpae bakko ra·anggipa gipin manderangara, a·dokni Deputy Chief Minister Prestone Tynsong, PHE Minister Renikton L Tongkhar aro gipinrang ong·a.
