RESUBELPARA: Meghalaya a·dokni gitcham minister aro National People’s Party (NPP)-ni dilgipa Frankenstein W Momin Budbar salo, an·tangni chawarigipa Sengnab Ch Momin aro NPP-ni gipin dilgiparang baksa NPP-oni ong·kate, Bharatiya Janata Party (BJP)-o napangskaaha.
Momin-ni chawarigipa Sengnab Ch Momin, NPP North Garo Hills district-ni general secretary ong·engachim aro da·o ua Mendipathar constituency-ni MLA Marthon J Sangma baksa susana NPP-oni ong·kataha.
Mendipathar-ni MLA Marthon Sangma-ba Mukul Sangma baksa AITC-o napna gita Congress doloni ong·katbaani ja·man da·o NPP-o napskaahachim ine nikna man·a.
NPP-oni ong·katani ja·man kobor ra·timgipa manderang baksa agangrikengon, batanggimin somoirangoba NPP-ni dilgiparang, mongsonggipa kamrangon uamang baksa agangrikchenggija skatang dakrongani gimin uamang NPP-ni kamo suk ong·nikjaha aro iani giminsa uamang da·alo NPP-oni ong·kataha ine Sengnab parakataha.
A·dokni gitcham minister FW Momin-ba an·tangni NPP-oni ong·katani gimin janapatengon, ua da·o bilsirang re·angahani gimin NPP-oni ong·katna nangnikaha ine parakatskaaha.
“Bilsirang re·angahani gimin da·o anga politics-ni kamrango bang·e jak on·na sikjaengaha indiba onbatgipa gadangni dilgiparang baksa agangrikchenggija kamrangko ka·rongani gimin anga NPP-ni kamo kusi ong·jaha,” ine Momin parakataha.
