Bilsi 50-ni ja·man M’laya-o dolsanchi sorkariko riktaigen: Conrad

SHILLONG: Ia 2023 Assembly election-ni ja·man Meghalaya a·doko dolsanchi sorkariko rikna gita a·dokni manderang, National People’s Party (NPP)-na cholko on·gen ine Bristibar salo, a·dokni Chief Minister aro NPP-ni national president Conrad K Sangma, an·tangni ka·dongchakenganiko parakataha.
“A·dokni manderang mangkimgipa sorkariko nangnikenga ine anga ma·sia aro ian manderangni jakon ong·gen maina Meghalaya a·doko bilsi 50-na skangsa dolsanchi sorkariko rikna man·ahachim. Bilsi 50-ni ja·man da·o ua itihasko an·ching nikpiltaina sienga. Indiba an·ching dolsanchi sorkariko rikna man·genma ian an·ching sakprakprakni sing·na nangani ong·enga,” ine Bristibar salo, NPP-ni tom·bimonganiko Shillong songjinmani Polo Ground-o ong·atanio Sangma aganaha.
Ia 2023 bilsini Assembly election-ara a·dokna namen mongsonggipa ong·enga ine janapatengon, a·dokko man·aoni bilsi 50 badeangaha aro ia bilsi 50-ni gisepo an·ching bang·a kamrangkon chu·sokatna man·genchim ine Chief Minister parakataha.
Re·baenggipa bilsi 50-ni gisepo a·dokni chadambe sakantian an·tangtangni jumangrangko chu·sokgipa ong·atna cholrangko man·na gita pangchakaniko songna nangchongmota ineba Sangma aganaha.
A·dokni me·chik sakantian kusi ong·gipa nokdangko rikna aro nokdangni namroro silroroanina on·gilpaaniko dakna man·na gita cholrangko on·na nanga ineba ua aganaha.
Ia chang election-ni result-o pangchake a·doko songdongenggipa manderangna nambata janggi tanganiko on·na NPP sorkari, pangchakaniko songe on·gen ineba Sangma parakataha.
2023 bilsio NPP-na cholko on·piltaigenchimode a·dokni manderang aro mongsongbate sima jolrango songdongenggipa manderang tom·tomao janggi tangna man·na gita uni sorkari, Assam aro Meghalaya a·dokni simarango ong·enggipa obostarangko namatna cholko sandigen ineba ua ku·rachakaniko on·angaha.
Batanggimin somoirango Meghalaya a·dok a·songni ka·mabatsranggipa gadangosa ong·rongachim ine janapatengon, ia bilsi bongani gisepon MGNREGS-ni kamrango Meghalaya a·dokba a·songo nambatsranggipa dambonga a·dokrangoni damsa ong·paengaha ine Chief Minister parakataha.
Meghalaya a·dokko man·aoni bilsi 50 gapanio chu·sokatgipa kamrangna bate batanggimin bilsi bongani gisepo NPP-chi dilenggipa sorkari, a·dokna aro a·dokni manderangna namroro silroroaniko ra·bana man·aha ineba Sangma parakataha.
Dingtang dingtang political dolni dilgiparangko aro candidate-rangko rimchaksoangengon, ia dilgiparang an·tangtangni man·gnina NPP-o napaha ong·ja indiba a·dokni manderangna dangdike on·na miksonganiosa napaha ine Sangma parakataha.