TURA: Ia chang Assembly election-o South Tura constituency-oni All India Trinamool Congress (AITC)-ni candidate ong·e susaenggipa Richard Marak, a·dokni chief minister Conrad K Sangma-ko chena ka·dongenga ine parakataha.
South Tura constituency-o AITC-ni candidate Richard Marak, a·dokni chief minister aro NPP-ni candidate Conrad K Sangma, BJP-ni candidate Bernard N Marak aro United Democratic Party (UDP)-ni candidate John Leslee K Sangma baksa bilakbee susagrikna siengachim.
South Tura constituency-o an·tangni chena ka·dongenganiko parakatengon, “Meghalaya a·doko Conrad Sangma-an maming kamrangko chu·sokatna man·sranggijagipa skanggipa CM ong·a maina uni dilanio a·dok sorkari, lekka pora, rama jal·lang, chadamberangna kamrangko on·ani aro sima arini bidingo kam ka·ani pilakan chu·sokgipa ong·jaha,” ine Richard matnangataha.
Uni election-na campaign ka·anio bang·a manderangan una chakpaanirangko on·engani gimin ua manderangko salna man·gen ineba ua an·tangni ka·dongchakenganiko parakataha.
“Meghalaya a·dok gimikon TMC-ni ‘WE Card aro ‘MYE Card’ manderang bang·en bimingrangko segattokenga aro ian a·dokna dingtangataniko ra·bagen ine chinga ka·dongenga. Da·o dipet ‘WE Card’-na lak 2-na baten nokdangrang bimingrangko segattokaha aro salbongani gisepon chinga aiao inmanpile manderangni aganchakaniko nikna man·aha,” ine Richard parakataha.
Conrad Sangma sorkarini somoio a·dokni manderang namen neng·nikanirangko chagrongna nangtokaha aro manderangni neng·nikanirangko TMC ma·sichakenga ineba ua parakataha.
“NPP-chi dilgipa a·dok sorkari, Assam sorkarini ge·etanirangkosa ra·e a·doko sason ka·aha aro iandake a·dokni manderangko kal·stekahani gimin manderang election-ni somoio uamangna aganchakaniko on·na sienga,” ine Richard aganaha.
