TURA: Meghalaya a·doko gipin skigiparang, jekai SSA, Adhoc UP, Government LP aro Non-Govt skigiparang pilakan December jani dormahako Krismasna skang man·tokahaoba 4th teacher-rangnade Krismasna skang dormahako on·jani a·sel skigiparang neng·nikanirangko chagrongna nangtokaha ine All Meghalaya Fourth Teachers Association (AMFTA) Garo Hills unit, suk ong·gijaniko parakataha.
AMFTA-GHU-ni president Tengsrang K Sangma-ni parakatani gitade, 4th teacher-rangna December jani dormahako Krismasna skang on·china gita didie uamang, December-ni 22 tarikon Education department-ni deputy director-na phone ka·atahachim indiba ua somoio tangka paisarang dongjani a·sel dormahako on·na man·jaenga ine Education official aganatenba, indiba tangka paisarangko watdapatchina finance department-na chittiko seataha ine parakatahachim.
Uni ja·man, December-ni 23 tarikoba association-ni dilgiparang, department-ni official-rangna phone ka·e sing·attaion, tangka paisarangko man·soahani gimin ua somoion SDSEO-rangna tangka paisarangko watatgnok ine official-rang aganatahachim indiba tangka paisarang SDSEO office-ona sokbachipjahachim ine Sangma parakataha.
“Bilsi gitalni ja·manoba association-ni dilgiparang DSEL-na phone ka·atenba, December jani dormahako on·atjahani gimin sing·attaion, office-ni kamrangko December-ni 23 tarikonasan ka·aiaha aro dingtang dingtang neng·nikanirang dongani a·sel tangka paisarangko somoi gita watatna man·jaha ine official-rang aganataha. Chingni man·na nangenggipa dormahako chinga Krismasna skang aro uni ja·manoba man·sokujae bang·a neng·nikanirangko chagrongna nangtokengaha,” ine AMFTA-GHU-ni president parakatenba, 4th teacher-rangni dormahako ta·raken watatchina a·dokni Chief Minister Conrad Sangma-ko aro finance department-ko mol·molataha.