SHILLONG: Meghalaya a·doko dingtang dingtang political dolni MLA-rangko rime katna jotton ka·enga aro mitamkode doltango napchina ka·mikkenatenga ine Sukrobar salo, Meghalaya a·dokni Congress dol, Bharatiya Janata Party (BJP)-ko matnangatenba, BJP-ni iandakgipa kamrangara India a·songni jakgitelani bilko pe·giparang gita ong·enga ine parakataha.
“Meghalaya a·dokni Assembly election-o BJP-ni candidate-rangko susaataniara uamangni bilan ong·a indiba uamangan a·songo jakgitelani bilko pe·giparangoni mongsonggipa gita ong·enga,” ine Meghalaya a·doko nitimenggipa All India Congress Committee (AICC)-ni dilgipa Mukul Wasnik parakataha.
Batanggimin somoirango BJP, salgro salaramni mitam a·dokrango aro Meghalaya sorkarioba napna man·paaha ine janapatengon, “Uamang election-rango an·tangtangan name dakna man·genchimode sorkariko rikgen indiba doltangari sorkariko rikna bil chu·onge man·jagenchimode uamang gipin dolni MLA-rangko bregopasan ong·aigija, ka·mikkenatanirangchiba rime katna jotton ka·ronga,” ine Wasnik parakataha.
Indake ong·engon, Meghalaya Pradesh Congress Committee (MPCC)-ni president Vincent H Pala-ba BJP-ko dakmesokna aro manderangna tol·na namen changgipa dol ine matnangataha.
“Angni chanchiani gitade, BJP dakmesokna aro manderangna advertise ka·na namen changgipa dol ong·a maina na·simang name niatgenchimode Shillong songjinma gimikon BJP-chi rong nonganiko nikna man·gen indiba uamangna pu·ongiparangko changenchimode uamango candidate-rangan dongja,” ine Pala parakataha.
A·dokni pilak biaprangon banner-rangko aro ma·manti noksarangko kadeengani gimin BJP, TMC aro NPP dolrangko apsan dakgipa dolrang ine matnangatengon, “Congress dolni kamrangde manderangni daka rikani gitasa ong·aia aro a·dokni manderangan tom·tomaniko namnikgiparang ong·ani gimin chingade gipin a·dokrango gita iandakgipa kamrangko ka·na sikja,” ine MPCC-ni president parakataha.