SHILLONG: Assam a·dok baksa meligrikna man·jaenggipa Meghalaya a·dokni simarango songdongenggipa manderang, jemangan Meghalaya a·dokni electoral roll-rango biming segatmanaha, uandakgipa manderangde da·o ong·atna sienggipa Assembly election-o pu·onna man·aigen ine Sukrobar salo, Chief Election Commissioner (CEC) Rajiv Kumar parakataha.
Re·baenggipa February jao ong·atna sienggipa Assembly election-na tarisamsoanirangko nina gita Chief Election Commissioner Rajiv Kumar-ni dilanichi, Election Commission of India (ECI)-ni official-rang, Meghalaya a·dokni skotong Shillong songjinmaona re·baahachim.
“Assam aro Meghalaya a·dokni simarango je obostarang ong·ahaoba, ia so·sojengjeng ong·enggipa Meghalaya a·dokni songrango songdongenggipa manderang, election-o bak ra·na man·aigen. A·dok damgnini gisepon nangrime pilakni gitan agangrikenga aro iani bidingo darangba jajrengna nangani dongjawa,” ine Kumar aganaha.
CEC-ni parakatani gitade, a·dok damgnini simarango ong·enggipa obostarangni bidingo Election Commission-ni gitaba nipilangaha aro iani bidingo a·dok damgnini district official-rangan tom·e chanchirimanirangko dakahani gimin Meghalaya a·dokni ning·o donggipa manderangna maming kenna nangani dongjawa.
Je constituency-rangon kenchakna nangbatanirang dongengachim uandakgipa biaprango apsan nangrime kamko ka·china gita dol 16 central agency-rangko ge·etmanaha ineba CEC parakataha.
Je political dolrangon ong·gija dakgipa kamrangna case donggimin manderangko candidate-na seokahachim, uandakgipa dolrangkoba joltangni songbadrango aro TV channel-rango komibeoba changgittam mesokatchina aro maini gimin uandakgipa manderangko candidate-na seokaha uko talatchina ge·etaha ineba Kumar parakataha.
Meghalaya Assembly election-ko tom·tomao aro nama bewalo ong·atna gita pilak nanga ja·kurangko de·enga ineba CEC parakataha.
