SHILLONG: Ma·mong sorkarini ra·gate on·gipa project-rangko Meghalaya a·doko National People’s Party (NPP)-chi dilenggipa a·dok sorkari mingsree kam ka·enga ine Sukrobar salo, Skill Development & Entrepreneurship-ni Union Minister of State Rajeev Chandrashekhar matnangataha.
Meghalaya a·doko ma·mong sorkarini project-rangko mingsreenga ine matnangenggipani bidingo sing·anina aganchakaniko on·angengon, Meghalaya a·doko mitam political dolrang, an·tangtangni chu·sokatgipa kamrangko mesokna dongja, da·o Assembly election-na skang, a·songni Prime Minister Narendra Modi-ni rasongosa teng·suna jotton ka·skaenga ine Chandrashekhar matnangataha.
BJP-ko Kristianrangni kosako chakatgipa dol ine matnanganiko jegalatengon, ian BJP aro Kristianrangni gisepo meligrikgijaniko ra·bana mitam dolrangni jotton ka·anisan ong·aia ine Union Minister of State parakataha.
Prime Minister Narendra Modi-ni rakbee kamrangko ka·engani a·selsa da·alo Meghalaya a·doko bang·en namroro silroroaniko nikna man·engaha ineba Chandrashekhar parakataha.
Iana skang, Sukrobar pringo BJP-ni tom·aniko West Shillong constituency-o ong·atanioba ua dongpae bakko ra·angaha aro ia tom·anio BJP-o napanggipa gital membor-rangko ua rimchaksoaha.