TURA: Dadenggre Civil Sub-Division-ko district-ni gadangona ra·doatchina dabiani da·o bilsi 26 ong·pilengahaoba chu·sokate on·chipkujaenga ine Garo Students Union (GSU) Western Zone (North) Dadenggre parakatenba, iani bidingo a·dok sorkarina gisik ra·attaianiko on·angaha.
Dadenggre-ko district songchina dabiani bidingo sorkarina gisik ra·atpiltaianiko on·angengon, batanggimin bilsi 26-na Dadenggre-o songdongenggipa manderang, Dadenggre sub-division-ko district songchina dabiengachim indiba dingtang dingtang sorkarirang, ia dabianiko chu·sokatchipkujaenga ine GSU Western Zone (North) Dadenggre-ni president Tengsan M Marak parakataha.
“Ian politics-ni gita dabiani ba badiaba political dolrangni ba election-rango dabiani ong·ja indiba manderangni dabianisa ong·a. Dadenggre Civil Sub-Division-ko district songchina dabiani da·o bilsi 26 ong·pilengaha indiba da·alonan ia dabiani chu·sokgipa ong·na man·kujaenga,” ine Marak parakataha.
Dadenggre Sub-Division-ni ning·o dal·bea biaprangko man·chapa aro bang·bata songrangan Tura-oni namen chel·grika ine janapatskaengon, Dadenggre-ni manderang pilak kamrangan Tura-ona re·a doanio bang·en neng·nikanirangko chagrongna nangronga, uni gimin Dadenggre-ko district songna nangchongmotenga ine GSU WZN Dadenggre-ni president parakataha.
“Indita bilsirangna chinga changni chang memorandum-rangko on·aha aro dingtang dingtang dolrang, jolo songdongenggipa manderang baksa tom·tome jingjengatanirangkoba dakaha indiba da·alonan ia dabianiko sorkari chu·sokate on·chipkujaenga,” ine Marak parakataha.
Bilsi 26-na Dadenggre-ni manderang chakchike sengaha ine janapatengon, da·o Dadenggre jolo songdongenggipa manderangni dabianiko sorkari, nachilchi ong·ja indiba manderangni nanganirangko ma·sichake chu·sokatani somoi ong·engaha ine GSU WZN-ni president didiataha.
