CM, Balalgre-o Captain Williamson State University-ko oprake on·a

Ampati: A·dokni mande-rangna aro dingtang-mancha Garo Hills-o Chief Minister Conrad K Sangma, Meghalaya-ni skanggipa State University-Captain Williamson Sangma State University (CWSSU)-ko aro uarangni South West Garo Hills-ni Balalgre songo nitogipa campus-o gital rikenggipa building-ko mijal Sonibar salo oprake nokdonggae on·angaha.
Chief Minister-ni Chief Adviser, Thomas A. Sangma, Commissioner aro Secretary, Education, B.D.R.Tiwari, Secretary, Education, Ambrose Ch. Marak, Vice-Chancellor CWSSU, R.D. Shira, Tura Municipal Board Chairman, J.D.Sangma, Chairman KVIB, Subir Marak,Registrar, CWSSU,  bang·a educational institutions & academician-rangni skotongrang, South West Garo Hills district administration-ni official-rang aro nokma-rang aro a·jolni manderang nokdonggani tom·ao dongpaaha.
Captain Williamson Sangma a·dokni skanggipa Chief Minister ong·ani ja·mano Meghalaya-ni skanggipa State University-ko ia Meghalaya-ni a·dokni jakgitelani bilsi 50 gapanio manderangna Chief Minister pakwate on·angaha.
Chief Minister oprake on·ao ian tiktak poraiani bakrang baksa Technical university ong·achim indiba batanggimin bilsirango dingtang dingtang neng·nika aro ra·bianirangko chinga chagrongaha uni gimin chinga an·tangtangon State University dongna nanga ine nike ia Technical University-ko full-fledged State University dakskana Cabinet chanchie ra·baaha. “Nanga ja·kurangko de·enga aro official-ni gita on·kangani kamna Governor u·iatgen,’’ ua aganaha.
University-na chu·onga gita namgniko on·china VC-ni dabianina aganchakao chingo donggipa namgni chu·ongja. Iani bidingo chinga kam ka·na aro poraigiparangni nangeng-gipa pilak nangchong-motgipa namgnirang University-o dongna gita master plan-ko dakna nanggen,” ua aganaha.
Full-fledged University dongode neng·nikani donggipa Common University Entrance Test (CUET)-ko namatna gita man·gen aro NEHU-na agre State University-na a·dokni college-rang cholko on·aniba ong·enga.
“Sima-ari pakma gita skanggipa nangrangko chamatan baksana rama dilmaoni campus-ona rama-sorokkoba on·ataha, ru·utgijan kamrangko ka·chakatgen. De·e mesokani gita ia university-na dal·gipa noksa, miksongani chinga kam ka·engaha,” aganaha.
“Ia university-ko ong·atna, chingni skanggipa State University-ko mikkangchi ge·sa nambatgipa dakna aro gimikni gitan system-ko bilakatna chinga bang·a ja·kurangko de·enga.” Education ia sorkarini skang-gipa dakgnioni mingsa ong·a, ua agandapaha.