Tura-ni MP Agatha, Nongalbibra-o RCC dolongko oprake on·a

BAGHMARA: Tura-ni MP Agatha K Sangma South Garo Hills-ni Nongalbibra songo  gitalgipa RCC Girder Bridge, 145.38m ong·e ro·gipa dollongko nokdonggae on·angaha.
Ru·uta sal somoirangna matchotchipgija dongipa dollongko chu·sokate on·ahanina, ua uni kusi ong·ani aro mittelpilani kattarangko manderangna aganaha. Uni aganani gitade gipin party-rang sorkariko challaiang-giparangde uamangni term bon·aonan 700 km rama sorokrangkosan tarie chu·sokatna gita man·aia, indiba MDA sorkari bilsi 5-ni gisepon 2234 km ro·gipa rama sorokrangko tarie on·na gita man·skaaha ine ua aganaha.
Gipinrang bilsi 20 ong·piloba chu·sokatna man·jawachim indiba MDA sorkari ia bilsi 5-ni gisepon ia pilakon dakna gita man·aha ine ua aganaha.
Ia rama sorokrangko tariani-chi skotong songjinmaona re·a doanio, bang·bata songdong a·chagipa manderangnan dakchaka-nirangniko on·engaha ineba ua agandapaha.
Ia dollongko nokdong-gae on·an baksanaba ua District Development Coordination aro Monitoring committee (DISHA)-ni tom·anio Baghmara DC Office District Resource Centre -o dilaniko dake uni ja·mano Centralni scheme-rang jerangan dingtang dingtang department-ni gita kamko ka·e mat-chotahachim uarangkoba nipilanirangko dakang-jolaha.