TURA: Re·baenggipa jao ong·atna sienggipa Meghalaya Legislative Assembly election-na Congress dolni candidate-rangko seokanio All India Congress Committee (AICC)-ni dilgiparang, doltangna kam ka·enggipa chadamberangni nangnikanirangko ra·chenggijasa seokaha ine Meghalaya Pradesh Youth Congress (MPYC)-ni mitam dilgiparang suk ong·gijaniko parakatenba, uamangni nangnikani gita candidate-rangko seokjagenchimode nangani kri ja·kurangko de·skana nangnaba gnang ine mikrakataniko on·angaha.
Iani bidingo South Garo Hills district working president aro general secretary Ruthledge N Sangma, MPYC vice president Phangcheng Ch Sangma, MPYC general secretary Robert K Sangma, South West Garo Hills president Tengrik T Sangma, general secretary Aksay G Sangma baksana Tura city-ni president Legitha Sangma aro gipin dilgiparang, dingtangmancha press conference-ko ong·atenba, AICC-ni kamo suk ong·gijaniko parakattokaha.
“High command-ni kamo chinga bilongen suk ong·jaha aro uamangni kamko chinga raken jegalenga. Doltangna kamko ka·e on·engon chinga chadamberangnaba jakgitele kamko ka·na on·na nanga. Je candidate-rangkon media-rango parakmanahachim, ua candidate-rangkon donchina chinga dabienga aro iarangko dingtangatjachina nangnikenga. Congress-ni high command, chinga asol biapo donge kamko ka·enggipa chadamberangni nangnikani gita ong·gija kamko ka·na jotton ka·enga aro iako chinga raken jegalenga. Salsa salgnini gisepo gipin dolrangoni re·bagipa candidate-rangna party tikit on·anikode chinga raken jegalenga,” ine MPYC-ni dilgiparang, kobor ra·timgiparangna parakataha.
Congress-ni dongimin niamrangko ja·rikchina high command-ko didiatengon, doltangna kakket ong·e dongenggipa candidate-rangnasa tikitko on·china aro da·o election-ni somoio susanamangmang gipin dolrangoni re·baenggipa candidate-rangnade tikitrangko on·jachina gitaba ia chadambe dilgiparang dabiangtokaha.
“Chinga MPYC-nasan ba MPCC-nasan kamko ka·enga ong·ja indiba Congress dol gimiknasa kamko ka·enga,” ine chadambe dilgiparang parakataha.