TURA: Mongolbar salo, India aro Bangladesh a·songni simao donggipa South West Garo Hills a·jani Kalaichar samba jolo, mongma bi·sa mangsa sel·uchi su·a man·e siangna gita nangaha.
Koborko on·ani gitade, ia mongma bi·sako Bangladesh a·songchipakni ma·sina man·gijagipa manderang sel·uchi su·atahakon ine chanchichipenga aro ia mongma bi·sako Wildlife department-ni manderang jokatna jotton ka·ahaoba, uni be·en ning·o sel·u ning·tue bu·ahani a·sel ia mongma bi·sako jokatna gita man·jaha.
Official-rangni aganani gitade, Sombar walo, dolsa mongmarang, Bangladesh a·songni song damsa gita re·pakangengmiting somoio songni manderang, ia mongmarangko a·rikgalsotokaha aro uandaken songni manderangoni saksa sel·uchi ia mongma bi·sako gochokatahakon ine chanchichipenga.
Ia mongma bi·sako sel·uchi gochokatan baksana bisikoba on·ahakon ine official-rang chanchichipenga.
Koborko on·ani gitade, January-ni 16 tariko mata bu·a man·gipa mongma mangsa Bangladesh a·songchipakni India a·songona katnapbae re·rurae dongengako nikaha ine BOP Balughat-o donako man·enggipa 28 Bn BSF-ni Off Coy Commander Douminwan, Wildlife department-ni Range Officer-na u·iataha aro ia mongma bi·sako jokatchina gita didiatahachim. Wildlife-ni official-rang, ua biapona salni 12:15 bajimango sokangon ia mongma bi·sa sisoskaahachim.
“Balughat-Kalaichar sima jolo mongma mangsa saknae dongenga ine koborko man·soa bakan Wildlife-ni dolsa manderang, veterinary doctor baksa ua biapona mongmako jokatna dariangahachim indiba ua biapona sokangon ia mongma bi·sa sisoaha,” ine West, South aro South West Garo Hills Wildlife-ni DFO Rupankar Marak parakataha.
Ia mongma siani ja·man doctor aro uko dakchakgipa manderang, mongmani be·enko rate nion, ia mongmani ka·rongte sambaona sokangpilgipa sel·u pongsako man·aha ineba DFO parakataha.