SHILLONG: Meghalaya a·doko niam gri koela bikotaniko champengatani a·sel indita bilsirangna koela badinge aro koela bikote cha·enggipa manderang neng·nikanirangko man·ani ja·man da·o a·doko koela bikotgipa mande sakbrini geological report-ko ma·mong sorkari ra·chakahani gimin a·doko niam gita koelarangko bikotna cholrang sokbaengaha ine kobor on·aha.
Re·anggipa Sombar salo, a·dokni Chief Minister Conrad K Sangma-ni kobor ra·timgiparangna parakatani gitade, a·doko koela bikotgipa sakbri manderangni geological report-ko ma·mong sorkarini ra·chakmanaha ine adita salrangna skang, a·dok sorkari baksa tom·anio Union Coal Ministry parakataha.
Ia sakbri koela bikotgipa manderang, science-ni bewalo koela bikotaniko a·bachengna gita licence-rangko man·na skang, uamangni mining plan ba koela bikotna tarigimin bewalrangko sorkarina on·chengna nanggen.
Meghalaya a·doko koela bikotaniko National Green Tribunal (NGT)-ni gita champengataniko ra·bie a·dok sorkari, Supreme Court-o mokordoma ka·doangahachim ineba Chief Minister parakataha.
“A·ani nokgiparangara, a·doko songdongenggipa tribal-rangan ong·a ine Supreme Court rai on·ahani gimin iano pangchake NGT-ni champengataniko ra·galpilaha,” ine Chief Minister aganaha.
A·doko niam gri koelarangko bikotkuengani gimin gisik ra·atpilaniko on·angskaon, niam pe·giparangni kosako ja·kurangko de·na gita MMDR Act-ni ning·o niamrangko on·manaha ine Chief Minister parakataha.
“Da·ode Meghalaya a·doko koela bikotaniko a·bachengpiltaina siengahani gimin anga ka·donga darangba niam gri koelarangko bikotjawaha,” ine ua aganaha.