RESUBELPARA: Budbar salo FOCUS aro FOCUS+ program-ni Interactive Program-ko Resubelpara-ni Bakra MFC-o ong·atangaha aro ia program-ko ong·atanio Meghalaya Assembly-ni Deputy Speaker aro Resubelpara-ni MLA Timothy D Shira, dingtang dingtang dolrang baksa agangrikangaha.
Ia program-ko ong·atanio Shira, jinmana aganprakangengon, jolo songdongenggipa manderangna sorkarini ra·gate on·gipa dingtang dingtang scheme-rangni gimin agan-talate on·angaha.
FOCUS, FOCUS+, YESS aro uandakgipa scheme-rangni bidingo agan-talataniko on·angengon, ia scheme-rangni ning·o manderangna on·enggipa tangka paisarangara bang·pajagenchimoba, ia tangka paisarangko an·tangtangni namgnina nama bewalo jakkalgenchimode ian uamangni kamrangko tang·doatna aro janggi tanganio dingtanganiko ra·bana man·gen ine Shira parakataha.
A·doko namroro silroroaniko aro manderangna namgnirangko ra·bana gitasa sorkari kamko ka·enga ine janapatengon, ia pilak scheme-rangkon sorkari, game ge·e cha·enggipa manderangni janggi tangani gadangko namdapatna gitasa ra·gate on·aha ine Resubelpara MLA aganaha.
Mitam manderangde ia scheme-rangni tangka paisarangko man·tokkujaenga ine janapatengon, a·dokni pilak biaprangon hajalni hajal manderang ia scheme-ni namgniko man·tokengani gimin aro Shillong-onisa kamrangko ka·engani gimin ja·manchakesa manderangni account-rango tangka paisarang napnaba gnang ine Shira parakataha.
Ia program-ko ong·atanio dongpae aganprakanggipa gipin manderangara, North Garo Hills a·jani Deputy Commissioner RP Marak, Superintendent of Police (SP) Shailendra Bamaniya, Additional Deputy Commissioner Leena Daring aro EAC Liam TG Momin ong·a.
