SHILLONG: Budbar salo, Ri Bhoi a·jani police-rang, gong kror 1.2-ni ‘heroin’ samrang baksana a·dok damsaoni damgipinona drugs badinggipa mande sakgniko rim·na man·aha.
Koborko on·ani gitade, drugs badinggipa mande sakgni, Manipur a·dokoniko Assam gita niam gri drugs-rangko Shillong-ona ra·angenga ine kobor man·soani ja·man Ri Bhoi a·jani Anti Narcotics Task Force (ANTF) official-rang, mikrakbee kamrangko ka·na a·bachengaha aro uandaken ia mande sakgniko Budbar attamni 5:00 bajimango, Ri Bhoi a·jani Byrnihat jolo rim·sona man·aha.
Ja·mano ANTF-ni official-rang, ia mande sakgnioniko am·sandion, ge 20 sabon bakosrangko chipe ra·bitgipa gong kror 1.2-mangni ‘heroin’ samrangko man·aha ine u·iataha.
Rim·ako man·gipa mande sakgniara, Shillong songjinmao donggipa Nongrim Hills-oni Abigail Vanpari Vanchhawng aro Maharashtra a·dokni Mumbai songjinmao donggipa Malad West Chincholoi Bunder Road-oni Rintu Chanshyam Saikai ong·achim.
Iani bidingo police-rang, NDPS Act-ni ning·o Nongpoh police station-o mokordomako ka·aha.