SHILLONG: Re·anggipa Bristibar salo, Bangladesh a·songona palsrukatna miksonge ra·angenggipa mang 17 matchurangko, Meghalaya a·dokni 4th Battalion BSF-ni sipairang, East Jaintia Hills a·jani simaoniko jokatna man·aha.
BSF official-rangni u·iatani gitade, ia matchurangko Rongtilla border outpost-o donako man·enggipa BSF sipairang, a·song damgnini simao donggipa buring damsao kadime donako jokatna gita man·aha.
“Niam gri matchu badinggipa manderang, India a·songni matchurangko Bangladesh a·songona palsrukatna gita pangnan dikbegipa buringrangosa dongnue donronga aro chol man·ahaon uamang, kolgipurang gita matchurangko Bangladesh a·songona watatronga. Indiba ia sal somoirango BSF-ni sipairang mikrake kamrangko ka·engani gimin niam gri badingatenggipa matchurangko bang·en rim·na man·enga,” ine BSF official parakataha.
A·song damgnini simarango ong·gija dakgipa kamrangko warachakna kam ka·anio BSF sipairang, 2022 bilsini gisepon mang 3481 matchurangko rim·na man·aha ineba BSF official parakataha.
Photo: Bristibar salo, BSF dolni rim·gipa matchurang.