TURA: Ja·manchake koborko man·soani gitade, re·anggipa Mongolbar walo, East Garo Hills a·jani Williamnagar jillao, gari bolsa scooty bolsako su·gake a·sel ong·aha aro ia a·sel ong·anio scooty-ko salenggipa mande so·otako man·aha.
Ia a·sel ong·ani Mongolbar wal 9:30 bajimango, Williamnagar super market samba jolo ong·aha ine kobor on·timgiparang u·iataha.
Koborko on·ani gitade, ua somoio Williamnagar-ni gitcham MLA Deborah Marak-ni depante Ruchil Marak, an·tangni i20 gario ta·rakbee re·baenba, scooty sale re·angenggipa Sengsrang B Marak-ko su·gakeaha.
A·sel ong·ani ja·mano bakan saknaa man·gipa mandeko hospital-ona ra·angahachim indiba ua mata bu·anirangko man·e siangaha ine kobor on·aha.
Iani bidingo police-rang, gitcham MLA-ni depanteko rim·aha ineba kobor on·aha.