TURA: Dadenggre constituency-ni ning·o donggipa Kantananggre songo bilsi 10 ong·na sipile songni manderang, bijoli gri ong·e dongtokna nangenga ine kobor on·aha.
Kobor on·timgiparangni u·iatani gitade, ia songara Dadenggre-oni kilometer bongamangsan chel·grikaiachim indiba ia songni transformer nosto ong·ani ja·man transformer-ko taripile on·na dongkujaengani a·sel songni manderang bilsi 10 ong·na sipile bijoli gri dongna nangtokengahachim.
“Chinga Magalpara songo donggipa adita ro·ong quarry-rangko nieani ja·man dokkan chongipa nape chingni mobile battery dongangjaengahani gimin phone-ko charge ka·na bi·on, ia songo 2014 bilsionin bijoli dongjaenga ine dokkan nokgipa chingna aganaha,” ine Phulbari-ni saksa Peter A Sangma parakataha.
Ia dokkan nokgipani iandake parakatani ja·man, uamang songni manderangko aro jolni Nokma Withison M Marak-ko grongna bi·aha aro uandaken ja·mano songni Nokma ua biapona re·bae, maikai uamang 2014 bilsionin bijoli gri ong·e dongna nangengachim, uamangna agan-talate on·aha ine Sangma parakataha.
Peter Sangma-ni parakatani gitade, 2014 bilsini wachi kario ia songni transformer nosto ong·aha aro ia transformer-ko tarie on·china songni manderang, MeECL office-ona re·ange badi ka·on, ia songo lak 3-na baten bijolini grorang dongkuenga inesa MeECL official-rang, songni manderangna aganchakaniko on·ataha ine songni Nokma parakaha.
Ia songo te 55-mangni nokdangrangsan dongaia aro ianoni te 28-de BPL connection-rangba dongachim ineba songni Nokma aganaha.
Komibeoba gong 1.5 tangkarangko gamna man·ja ong·ode transformer-ko taripile on·na man·jawa ineba MeECL office-oni songni manderangna aganataha ineba songni Nokma parakaha.
“Ua somoio songni manderangan jagittamprakon bill-ko sokate on·rongani gimin songni manderang bang·batan somoi gita kajinarangko gamengachim indiba maikai chingni gro gong lak 3-ona tang·doangaha chinga darangba ma·sina man·jaha. MeECL office-ni manderang, chingni transformer-ko tarina gong·jahani gimin chinga electrician saksa rime transformer-ko tariatna man·aha aro bijoliko man·pilahachim. Indake ong·genchimoba ja·mano, MeECL-ni manderang chingni songona re·bae transformer-kon okgalenba an·tangtang baksa ra·angaha aro ua somoinin chingni songo bijoliko man·chipjaengaha,” ine songni Nokma Withison Marak parakataha.
Iani ja·mano songni manderang, maming chol dongjae, uamangni MLA James Sangma-ko grongenba dakchakanirangko on·china mol·moleahachim indiba ua songni manderangna maming dakchakanirangko on·jaha ineba Nokma parakataha.
Iani bidingo, MeECL-ni kamko jako ra·e ka·skaenggipa FEDCO-o sing·sandiaton, ia songo bijoliko man·jaenga inede uamang ma·siengachim indiba songni manderang changsaba uamangona re·bae aganea dongkuja ine Dadenggre division-ni ning·o donggipa FEDCO-ni SDO saksa parakataha.
Ia songo bijoli gro agre bang·ahani giminsa songni transformer-ko ra·galaha indiba songni manderang uamangona re·bae agangrikegenchimode songni manderangna bijoliko on·piltaina gita cholko sandina man·genchim ineba SDO parakataha.