SHILLONG: Meghalaya a·dokni manderangoniko ra·seke ra·enga aro ma·mong sorkarini ra·gate on·gipa scheme-rangko an·tangtangsa a·kanggope ra·na jotton ka·enga ine Meghalaya BJP-ni state vice president Bernard N Marak, NPP-chi dilenggipa a·dok sorkariko matnangatenba, Meghalaya a·doko namroro silroroaniko aro dingtanganiko ra·bana gitade Prime Minister Narendra Modi-ni engine ge·gni donggipa sorkarikosa nangenga ine parakataha.
“Bilsi bongaprakon MLA-rang, an·tangtangni annual budget-rango bang·a korosrangko mesoke namroro silroroani kamrangko ra·baani gimin aganronga indiba a·doko nikna man·enggipa kamrangde pilakan Narendra Modi-ni dilanio ma·mong sorkarini ra·gate on·gipa scheme aro project-rangsan ong·aia,” ine Marak parakataha.
Meghalaya a·doko Modi-ni engine ge·gni donggipa sorkarikosa nangenga maina iasa a·dokko pilakni gitan dingtangatna man·gen ineba Tura-ni BJP MDC parakataha.
A·doko kangal cholgrirangni janggi tanganiko dingtangatna gitasa rama jal·lang, lekka pora, an·seng baljokani, chi on·an aro uandakgipa dingtang dingtang project-rangko ma·mong sorkari ra·gate on·ahachim ine janapatengon, ia kamrangna a·doko darangba ma·mong sorkarikode mitteltokjaenga ine Marak, suk ong·gijaniko parakataha.
“A·doko songe on·enggipa bang·bata pangchakanirangon, tangka paisarangko chame on·enggipa Ministry-kode janapjaenga. A·doko kadegipa bang·a banner-rangan ma·mong sorkarini ra·gatgipa project-rangkon mesokengachim indiba ia banner-rango Prime Minister Narendra Modi-ni noksako nikna man·jaenga,” ine Meghalaya BJP-ni state vice president parakataha.
Mitam noksarangode ma·mong sorkarini scheme aro project-rangnan, a·dokni dilgiparang an·tangtangni noksarangkosa tapskaenga ineba Marak parakataha.
