TURA: Prime Minister Narendra Modi-ni ra·gatgipa Pariksha Pe Charcha program-ni bak gita Sombar salo, painting competition ba rong nongsusaaniko Tura-ni Kendriya Vidyalaya-o ong·atangaha aro ia rong nongsusaanio dingtang dingtang skulrangoni bang·bea chatro chatrirang bakko ra·angtokaha.
Ia program-ko ong·atna gita a·song gimikni dam 500 Kendriya Vidyalaya (KV)-rangko seokaha aro ia dam 500 KV-rangoni Tura-ni KV-ba damsa ong·paaha.
Painting competition-ko ong·atna skang kan·dikgipa program-ko skulo ong·atangchengaha aro ia program-ko ong·atanio Jury-ni Member Secretary aro NSTI-ni Training Officer Darisa Kharwanlang, mongsonggipa sokgipa ong·e bakko ra·angaha.
Ia program-ko ong·atanio Kharwanlang, bak ra·enggipa chatro chatrirangna aganprakengon, pilak kamon chu·sokgijanide dongaia ine an·tangtangni chu·sokgijagipa kamrangna duk ong·e dongaijachina aro pangnan chakattaitaie chu·sokgipa ong·na gita tikkelchina chatro chatrirangko didiangaha.
Ia painting competition-o chegipa chatro chatrirangara skanggipa Baghmara JNV-ni Sengkame B Marak, gnigipao Tura Kendriya Vidyalaya-ni Priya Saha, gittamgipao Tura KV-ni Dome Momin, brigipao Mahendraganj JNV-ni Dipanita Rabha aro bongagipao Tura Captain William School-ni Cheana B Marak ong·a.
