SHILLONG: ‘An·senganian gam’ ine aganani gnang, indiba an·senganiara gamko man·ani rama ong·na man·ja. An·seng-baljokanio tangkarangko ong·gija jakkalanirangko a·dokni ong·bachengaonin nikna man·aha. Indiba ia ong·gija dakanirangko adita bilsirangna skang bang·batanirangko nikna man·aha, maina an·seng-baljokanina jakkalna on·gimin tangkarangko cha·ani ba ong·gija dake jakkalani, somoi badegimin samrangko jakkalani, tol·pinikgipa health contract-rangko jakkalanirangko nikrongaha ine National People’s Party (NPP) parakataha.
2010-18 bilsiona Mukul Sangmani sasono ong·mitingo, an·seng-baljokani bidingo bang·a ong·gija dakgipa kamrang a·dokko jingjengataha. Unomiting ong·enggipa a·dok sorkarini capsule scam nakataha jeon kror 7 damna batgipa capsule-rangko NRHM-ni ning·ao bree me·asarangni banji ong·aniko namatna ine tol·e on·aha, jekon da·ona kingking manderang gisik ra·engkua. An·o kegipa ma·giparangni bidingoba ong·gija ba kakketgija kamrangjo ka·anirang dongaha. A·dok ua somoio lak 15 tablet-rangni gita breaha, jean jakkalani somoina badeahachim, aro uarangko an·chi komigipa me·chikrangko aro an·o kegipa ma·giparangko sanna gita jakkalaha. Iako breaniko dakaniara NRHM-ni ning·ao bregimin an·o kegipa ma·giparangko sanna ine 2010-11-oni 2011-12 bilsirango kror 1.44-ni tangkarangchi koros ka·gipani bak ong·a.
Iarang pilakchi, a·doko an·seng-baljokani gadangrang aro mesokgipa chinrang namen tang·onaha ine u·ina gita man·a. Mukulni sasonko ‘Corruption pandemic’ ba ‘tangkarangko kakketgija jakkalani sajinma-sagop’ ine aganna gita man·gen maina kosako janapgimin kamrang mandeko siaona sokatna gita ama aro uni sorkari songsarni pilak dolrangni, aro mikkangchini chasongrangni an·seng-baljokaninaba simsak-nirokani dongja ine nikna gita man·a. Indiba da·ororo obostarang dingtangaha.
Adita salrangna skangoni, a·doko an·seng-baljokani bidingo bang·a nambata dingtanganirangko nikna a·bachengaha. A·dokko sanna-banani bidingo ra·dona gita, Conrad Sangma-ni dilanichi da·o ong·enggipa a·dok sorkari “Nang·ni an·seng-baljokani – chingni dakchengna nanggni” ine miksonganiko done, an·seng-baljokanina krenge kam ka·aha.
Kror 350 tangkarangna baten an·seng-baljokaniko nambatatna kororsrangna tikatanichi, MOTHER Programko a·bachengataha jean da·ona kingking lak 2.3 an·o kegipa ma·giparangna aro ma·giparangna namgnirangko on·aha. Una agreba CM Safe Motherhood Scheme-ko sanchakram biaprango bi·sa an·pakanirangko dakna bol 150 garirangko aro te 80 dongchakchengani nokrangko tarie a·bachengataha, MHIS-ni ning·o man·anirangko gipataha, dam 2000 health centre-rangko tariaha aro namdapataha aro sorkari mamung cholkoba watchangjaha. Iana agreba, Conrad-ni sorkari sak 300-na baten medical officer-rangko rakkiaha, diltugipa songrangona samrangko sokatna dingtangmanchagipa Drone Medicine Delivery System-rangko a·bachengataha aro a·dokni dongtang dingtang biaprango teleconsultation clinic-rangko a·bachengataha.
Songdonggipa manderangna an·seng-baljokaniko on·na dingtangmancha krenge kam ka·anichi nambata biterangko man·aha. Meghalaya-o 91% bi·sarangna chu·gimik tikkarangko su·na man·aha, aro uandaken tikka su·anio nambate dakenggipa a·dokrangoni damsa ong·aha. Bi·sa an·pakanio ma·giparangni siani 9%-ni gita aro atchidaldal bi·sarangni siani 21%-ni gita komiaha. Union Health Ministry-ni 2019-21 bilsirango National Family Health Survey-ni (NFHS) gita nianio, bilsi 15-49-ona ong·gipa me·chikrangni an·chi komie saani komianganioba Meghalaya nambatgipa a·dokrangoni damsa ong·enga.
An·seng-baljokanio dingtang dingtang kamrangko ka·anina a·dok national level-o boksisrangkoba man·aha. India-o TB-ko gimaatna kam ka·anio ACSM-na National Workshop ong·atanio Meghalaya Best Practice in Advocacy, Communication and Social Mobilization ingipa bimungko man·aha. Una agreba, dam 448 Health and Wellness Center-rangkoba Ayushman Bharat Comprehensive Primary Health Coverage-ni (AB-HWC) ning·oba dongimin kamrangko matchotataha. A·dok Ayushman Utkrishtata Puraskaar-ko (Ayushman Excellence Awards) minggni dolo man·aha- Healthcare Professional Registry-o bang·bata doctorrang aro nurserang dongani gimin aro minggipinara Highest ba bang·bate Ayushman Bharat Pradhan Mantri Jan Arogya Yojana (AB PM-JAY) schemeko jakkalani. (2021-22)
Ia rasong chaanirang Meghalaya-o an·seng-baljokani ramako batanggimin bilsi 5-o, Conrad Sangma-ni dilanichi dingtanganiko ra·baanirangko mesokani ong·a, jean namgipa dakmesokani aro uni re·dilanio mongsonggipa dakdilani ong·a. Koros amchakgija aro pilakchina sokgipa sanna-bananiko on·a uni niksamsoani, ru·utgija salrangni gisepon chu·sokgipa ong·gen.