TURA/RESUBELPARA/BAGHMARA/
Tura-o ia chang 13-gipa National Voters’ Day-ko Tura-ni DRDA Conference Hall-o maniangaha aro ia manianio West Garo Hills a·jani Deputy Commissioner Swapnil Tembe, mongsonggipa sokgipa ong·e jinmana aganprakangengon, batanggimin chang election-o West Garo Hills a·jao bilsi 18 batgiparangni pu·onani 80 percent-mang ong·aha aro ia election-oba bang·bata manderang pu·ongen ine an·tangni ka·dongchakenganiko parakataha.
Bilsi sokgimin manderangko electoral roll-rango biming segatchina dingtang dingtang SVEEP program-rangko ong·atrongenga ine janapatengon, election ba dilgipako seokanio pilakkon gisiko nange bak ra·china Tembe didiangaha.
Assembly election-na Model Code of Conduct-ko ra·gatahani gimin election-ko nama bewalo aro tom·tomao ong·atna man·na gita niamrangko ja·rikchina gitaba ua dingtang dingtang political dolrangko aro candidate-rangko didiangaha.
Ia National Voters Day-ko maniani bak gita ua voters’ pledge ba voter-rangni ku·mikchetanikoba dakdilangaha aro ja·mano a·jani nambatgipa booth level officer-rangna aro enumerator-naba mande ra·pilskaaniko dakangaha.
Ia salko maniani bak gita Slogan sesusaani aro noksa salsusaanirango chegiparangnaba ia tom·anio Deputy Commissioner-ni jakchi certificate-rangko suale on·angaha.
North Garo Hills a·jaoba ia National Voters’ Day-ko Mendipathar Multipurpose Cooperative Society Hall-o maniangaha aro ia salko manianio North Garo Hills a·jani Deputy Commissioner RP Marak, mongsonggipa sokgipa ong·e jinmana aganprakangengon, election changantian gisiko nange aro kenani gri, an·tangtangna on·gimin bilko jakkale, dilgipako seokanio bak ra·china manderangko didiangaha.
Systematic Voters’ Education & Electoral Participation (SVEEP) program-ni bidingo talataniko on·angengon, SVEEP program-ko a·bachengatna skangde, election-rango bak ra·na nangani gimin manderangna talate on·anirang dongjae, manderangni bak ra·anirang komirongachim indiba SVEEP-ko a·bachengate, dingtang dingtang program-rangchi manderangna agan-talate on·aniko dakahani a·sel da·o election-rango manderangni bak ra·ani tang·dobaroroengaha ine Marak parakataha.
Ia salko maniani bak gita, 39-Resubelpara Assembly constituency-ni sakbonga gital voter-rangko seokenba, uamangko mande ra·pilskaani chin gita Deputy Commissioner-ni jakchi Election Photo Identity Card (EPIC)-rangko suale on·ataha.
Ia program-ko ong·atanio District SVEEP A·we Peddlers-ba bakko ra·angaha aro manderangna election-o bak ra·na nanganiko talate on·ani bak gita Mendipathar-oni Resubelpara-ona cycle-rango re·jomangaha.
Apsan daken, South Garo Hills a·jaoba ia chang 13-gipa National Voters’ Day-ko Baghmara-ni DRDA Training Hall-o ong·atangaha aro ia salko maniani bak gita Bike Rally, Voters’ Day Marathon aro uandakgipa dingtang dingtang program-rangko ong·atangaha.
Ia manianio, South Garo Hills a·jani Deputy Commissioner Shivansh Awasthi, mongsonggipa sokgipa ong·e jinmana aganprakangengon, a·jani dambebatsranggipa voter-na mande ra·pilskaaniko dakangenba, dilgipako seokanio a·songo songdongenggipa manderangni dakna nanggnirangko agan-talate on·angaha.
Election Commission of India (ECI)-ko 1950 bilsini January 25 tariko songchengahani gimin ia salko gisik ra·ani bak gitasa bilsiantian January-ni 25 tariko National Voters’ Day-ko manienga ineba South Garo Hills a·jani Deputy Commissioner parakataha.
South Garo Hills a·jao election-ko pangnan tom·tomao ong·atrongengani giminba ua an·tangni kusi ong·aniko parakataha.
South Garo Hills a·jaoba ia salko manianio gital voter-rangna EPIC-rangko suale on·ataha.
South West Garo Hills a·jaoba chang 13-gipa National Voters’ Day-ko Ampati Bazar sambao donggipa MFC-o maniangaha aro ia salko manianio South West Garo Hills a·jani Deputy Commissioner Gideon Kharmawphlang, voters’ pledge ba voter-rangni ku·mikchetaniko dakdilangaha.
National Voters Day-ko maniani bidingo jinmana talate on·angengon, a·songo songdonggipa mande ong·e dilgipako seokanio bak ra·aniara mongsonggipa daito ong·a ine Kharmawphlang parakataha.
An·tangtangko on·kange kamrangko ka·engani gimin ua District Election Office-ni officer-rangko aro BLO-rangkoba mittelpilangaha.
Ampati-o ia National Voters’ Day-ko manianio Saldorik D Sangma, Ampati A·chik Cultural Club, Unique Crew Dance Group aro dingtang dingtang dolrangni git ring·ani aro dakmesokanirangkoba nikangna man·aha.
Ia salko manianio, South West Garo Hills a·jani nambatgipa booth level officer (BLO)-rangna aro enumerator-rangnaba mande ra·pilskaanirangko dakangaha.