SHILLONG: Batanggimin bilsi bongana NPP-chi dilanggipa MDA sorkari, Lok Sabha-ni gitcham Speaker Purno A Sangma sagini namgipa gunko ra·ongalani ja·man da·o election-na skang uni guno pangchakna jotton ka·enga ine Meghalaya a·dokni Trinamool Congress (TMC) matnangataha.
“PA Sangma-ni bimingo vote-rangko gilamaniara Garo Hills-na aro a·dokni manderangna NPP-ni dilgiparango maming kamrangko mesokna donggijaniko mesokanisa ong·enga,” ine TMC Meghalaya-ni vice president George B Lyngdoh parakataha.
Adita salrangna skang, NPP-ni campaign ka·aniko Adokgre songo a·bachengatanio, NPP-ko dilgiparangni Purno Sangma sagini gunrangko agane, an·tangtangna pu·onchina manderangko didiahani gimin Lyngdoh, ia kattarangko aganaha.
“Bilsi bongana MDA sorkariko chalaianio uamang PA Sangma-ni gunkon ra·ongalaha aro da·o election-ode uamang uni bimingo vote-rangko gilamna jotton ka·skaenga. Purno Sangma-ni mingnamgipa gunrangko uamang kimite galaha,” ine TMC Meghalaya-ni vice president aganaha.
PA Sangma sagide saksa mikkango donge dilgipasa, a·dokni manderang baksa chadenggipa mandesa, simarango donggipa songni manderangko watgalgijagipasa aro uni somoiode maming ong·gija dakgipa kamrang dongjachim ine gisik ra·atpilaniko on·angengon, “PA Sangma-de pangnan manderangni ku·rangko knachakgipa mandesa ong·achim aro uon chinga pilakan rasong chagipa ong·achim,” ine Lyngdoh parakataha.
Meghalaya a·dokona Purno sagisa TMC-ko ra·bachenggipaba ong·achim ineba ua aganaha.
“Uni a·dokna on·gilanirangko nikmane, uko (Purno)-ko ra·ongalgipa dolna Garo Hills-ni manderang pu·onna sikgenchimode chinga uamangna namen ka·sachaka,” ine Lyngdoh parakataha.