Garo Hills-oba chang a·songni chang 4-gipa Republic Day-ko manianga

TURA/RESUBELPARA/AMPATI: A·songni gipin biaprango gita Garo Hills-ni dingtang dingtang biaprangoba a·songni chang 74-gipa Republic Day-ko re·anggipa Bristibar salo tom·tome maniangaha.
Tura-o ia salko New Tura-ni Matchakolgre LP School kal·chakramo maniangaha aro ia salko manianio West Garo Hills a·jani Deputy Commissioner Swapnil Tembe, a·songni nisanko badale on·angan baksana dol 10 Parade ka·gipa dolrangkoba salam ka·angaha.
Parade ka·gipa dolrangara, Tura DEF, 2nd MLP Battalion Goeragre, Tura Government College NCC, Tura Don Bosco College NCC, Scouts & Guides aro 2nd MLP Battalion Goeragre-ni Band Party ong·a. Parade-ko Deputy Superintendent of Police (DSP) W Momin dilangskaaha.
Ia manianio West Garo Hills a·jani Deputy Commissioner, tom·anio bak ra·giparangna aganprakatengon, 1950 bilsini ia gita salon India a·song dal·batsranggipa jakgitelaniko man·aha aro a·songo songdongenggipa manderang ong·e a·songni niam bidiko on·gimin bilrangan a·songni manderangko chel·chakenga ine parakataha. Constitution-ni Article 51 A-ni Part IV A-o on·gimin daitorangko a·songo songdongenggipa manderang ong·e rakkiskana nanga ineba ua aganaha.
A·songni jakgitelanina an·tangtangko on·kange kam ka·anggipa pagitcham ma·gitchamrang, jekai Netaji Subhas Chandra Bose, Bhagat Singh, Rajguru, Sukhdev aro Meghalaya a·dokni U Tirot Sing, U Kiang Nangbah aro Pa Togan Nengminja Sangma-koba ia salo gisik ra·e dingtangmancha mande ra·pilskaaniko dakangaha.
A·songo songdongenggipa manderangna chel·chakanirangko on·engani gimin ia salo ua Army, paramilitary aro Police dolrangkoba mittelpilangaha.
Meghalaya a·dokko ong·telaigipa biaprangna aro ma·manti a·ningni gam-jinrangna mingsing minggama ine janapatengon, ia nitobegipa a·dokko mikkangchi namroro silroroatangkuna gita a·doko songdongenggipa manderang pilakkon bakrime kam ka·china Tembe didiangaha.
Ia salko manianio dingtang dingtang department-rangni tableau mesokaniko, dingtang dingtang skulrango poraienggipa chatro chatrirangni git ring·ani aro chrok mesaanirangkoba nikangna gita man·aha.
Ia chang 74-gipa Republic Day-ko manianio, SSLC aro HSSLC porikkarango teng·sugipa chatro chatrirangna, dingtang dingtang kamrango chu·sokgipa chadamberangna, dingtang dingtang department-rango bimchipe kam ka·enggipa manderangna aro West Garo Hills a·jani Aapda Mitra volunteer-rangnaba Deputy Commissioner-ni jakchi mittelpilani certificate-rangko on·angaha.
Ja·mano bi·sarangni kal·susaanirangko aro DC XI baksana SP XI dolni gisepo robol kal·susaanikoba Tura-ni PA Sangma Stadium-o ong·atangaha.
Apsan daken, North Garo Hills a·jaoba a·songni chang 74-gipa Republic Day-ko Resubelpara Mini Stadium-o maniangaha aro ia salko manianio North Garo Hills a·jani Deputy Commissioner RP Marak, mongsonggipa ong·e bakko ra·angenba, a·songni nisanko badale on·angaha.
North Garo Hills a·jao gimik dol 14 parade ka·gipa dolrangkoba ua salam ka·angaha aro ia dolrangara, Meghalaya Police Battalion, Mendipathar College NCC, Scouts aro Guides-rang ong·a. Parade ka·susaanio nambatgipa march past-ni boksisko Resubelpara Girls Higher Secondary School (Boys) cheangaha.
Ia manianio North Garo Hills a·jani dolchet sorkari office-rang, an·tangtangni kamrangko tableau-chi mesokangskaaha aro tableau mesoksusaanio District Agriculture aro Horticulture department chegipa ong·aha.
Ia manianio North Garo Hills a·jani Deputy Commissioner RP Marak, jinmana aganprakangengon, a·songni niam bidikko tarianichi a·songna jakgitelani aro mikkim rasongko ra·baahani gimin a·songni pagitcham BR Amkedkar-na mande ra·pilskaaniko dakangaha.
A·songo songdongenggipa manderang ong·e, a·songni niam bidikko ja·rikgiparang ong·china aro namroro silroroanina ku·cholsan kamko ka·china gitaba Marak didiangaha.
Ia salko manianio dingtang dingtang kamrangko ka·enggipa manderangna, kal·susaanirango teng·suenggiparangna aro lekka poranio chu·sokenggipa chatro chatrirangnaba dingtangmancha mande ra·pilskaanirangko dakangaha.
South West Garo Hills a·jaoba a·songni chang 74-gipa Republic Day-ko Ampati Mini Stadium-o maniangaha aro ia salko manianio South West Garo Hills a·jani Deputy Commissioner Gideon Kharmawphlang, a·songni nisanko badalate on·angaha.
Ia salko manianio South West Garo Hills a·jani Superintendent of Police (SP) Stephen Rynjah, District Administration-ni official-rang, dingtang dingtang department-ni officer-rang, chatro chatrirang aro gipinrangba dongpae bak ra·angtokaha.
Ia salko manianio Meghalaya Police, NCC aro Scouts & Guides-rangko man·chape gimik dol 11 parade ka·gipa dolrang March Past-ko ka·angaha aro dolchet sorkari department-rangba tableau mesokanio bak ra·angtokaha. Tableau mesoksusaanio skanggipa boksisko PHE, gnigipako Horticulture aro gittamgipako District Commerce & Industries Centre (DCIC) cheangaha.
Ia tom·anio dingtangmancha police aro dingtang dingtang department-rango kam ka·gipa adita sak manderangnaba uamangni kamrangna mittelpilani chin gita certificate-rangko on·angaha.
Ia salko maniani bak gita cultural program, bi·sarangni kal·susaani aro DC XI baksana SP XI-ni gisepo robol kal·susaanikoba ong·atangaha. Robol kal·susaanio SP XI dol goal 4-ko aro DC XI dol goal 2-ko chipe SP XI dolan chegipa ong·aha.
Apsan daken, South Garo Hills a·jaoba a·songni chang 74-gipa Republic Day-ko Baghmara-o maniangaha aro ia salko manianio South Garo Hills a·jani Deputy Commissioner S Awasthi, a·songni nisanko badalate on·angan baksana dol 10 parade ka·giparangko salam ka·angaha.
Ia manianio sorkari office-rangba tableau mesokangaha aro tableau mesoksusaanio skanggipa boksisko District Horticulture, gnigipa boksisko Fishery aro gittamgipa boksisko Agriculture department cheangaha.
March past ka·susaanio JNV Boys aro UBSS Baghmara chegipa ong·skaaha.
Ia salko manianio South Garo Hills a·jaoba dingtang dingtang kamrangko ka·enggipa adita sak manderangna certificate-rangko on·angaha aro rongtalbatsranggipa gittimrangnaba tangkarangko boksis dake on·angaha.
Ja·mano bi·sarangni kal·susaani, exhibition football match aro cricket match-koba ong·atangaha.