SHILLONG: Meghalaya Legislative Assembly election-ko ong·atengani gimin a·songni Prime Minister aro Bharatiya Janata Party (BJP)-ni dilgipa Narendra Modi-ba a·dokni Khasi, Jaintia aro Garo Hills a·jarangona re·bae, BJP-ni candidate-rangna campaign ka·anggen ine Sukrobar salo, BJP-ni state president Ernest Mawrie parakataha.
Mawrie-ni parakatani gitade, da·o dipet Prime Minister-ni a·dokona wenbaani tarikko name tik ka·kuja indiba ua February-ni 10 ba February-ni 11-12 tarikrango re·baani cholrang dongenga.
“Da·o dipet Modi-ni re·baani tarikrangko name tik ka·kuja indiba ua (Modi) February-ni 10 ba 11-12 tarikrango, Khasi Hills, Jaintia Hills aro Garo Hills-rangona re·bagen,” ine Mawrie parakataha.
Uni a·dokona re·baanio ia damgittam jolrangon jinma tom·bimonganirangko ong·atgen ineba ua parakataha.
BJP state president-ni parakatani gitade, Meghalaya Assembly election-na BJP-ni sak 20 dilgiparang, a·dokona re·bae campaign-ko ka·anggen aro ia sak 20-oni Amit Shah, Rajnath Singh, Smriti Irani, Nitin Gadkari aro dingtang dingtang a·dokni chief minister-rangba bak ong·gen.
