SHILLONG: Re·baenggipa February-ni 27 tariko ong·atenggipa Meghalaya Legislative Assembly election-na Indian National Congress (INC)-ni sak 55 candidate-rangko parakataha aro ia sak 55-oni sak 10-de me·chikrang, sakdokde MDC-rang aro adita sakde chadamberang ong·enga.
Ia sak 55 candidate-rangoni niksengbatgipa candidate-rangara, Vincent H Pala, Deborah Marak, Celestine Lyngdoh, Rona Khymdeit, Charles Marngar, PN Syiem, Ronnie V Lyngdoh, Nehru Suting, Gabriel Wahlang, Brigady N Marak, Billykid A Sangma, Saleng A Sangma aro gipinrang ong·a.
NCP-ko wate Congress dolo napanggipa Saleng A Sangma, an·tangni gitcham Gambegre constituency-onin susataina gita tikitko man·aha aro Rophul S Marak-ba an·tangni gitcham Rongara-Siju constituency-onin susataina gita Congress tikitko man·aha.
Re·anggipa Mongolbar salo AICC-ni screening committee, New Delhi-o tom·e chanchirimangaha aro uni ja·man central election committee-ba tom·e, Meghalaya Assembly election-na Congress candidate-rangko ra·chakangaha.
“Ia sak 55 candidate-rangoni sak 33-de chadambe candidate-rang aro sak 10-de me·chikrang ong·a aro Congress dolni candidate-rango Hindu, Muslim, Christian aro Seng Khasi-ko man·chape pilak toromni candidate-rangan donga,” ine MPCC-ni president Vincent Pala parakataha.
Bangki dongenggipa dambonga seat-rangnaba uamang bakan candidate-rangko parakatgen ineba Pala aganaha.
