SHILLONG: NPP-ni dilenggipa MDA sorkari Meghalaya-ko nitobatatna aro manderangko bang·bate re·baatna gita gisik nange kam ka·ahani a·sel a·doko Tourism-ni tang·dobaaniko nikna man·aha ine NPP a·kangataha. Meghalaya a·dok, mongsongbate COVID-ni ja·manoni manderangni re·bana namnikgipa biap ong·enga. 2024 bilsio Meghalaya-ko nina ba roramna re·bagipa manderang lak 15-mang ong·gen ine niksamsoenga. Meghalaya-ni tourism, dongchakani biaprang donggijanichi, rona namgipa biaprangona ramarang namgijanichi, aro cholrang chu·onggijanichi neng·nikanirangko man·aha. Conrad Sangma-ni dilenggipa sorkari ia neng·nikanirangko namatna dingtang dingtang ja·ku de·anirangko dakna nangaha aro manderangni rona namnikgipa gipin biaprang gita apsan gadangona tarina nangaha.
Tourism a·dokni GSDP-na 4.1% on·gila aro sak 50,000-ni gita manderangko kamna rakkia, indiba tourism-o batanggimin sorkarirangni inditan galchipaniko man·a. Meghalaya-ni songrango tourism-ko cooperative society-rangchi bariatna “Tourism through Cooperatives”-ko a·bachengatenga. Da·o dipet, iandakgipa project-rang ge 36 donga jekon Primary Cooperative Society-rang songrango chalaienga. Dakchakna, bilakatna, gipin songrangona gipatna aro projectko name chalaina man·a gita, Primary Tourism Cooperative-rangko State-level cooperative society-rang dilenga.
Conrad-ni sorkari dingtangmanchagipa scheme-ko bikotaha – uan Homestay scheme jeon ge 2,500 homestay-rangna subsidy on·e homestay-rangko rikna dakchakenga. Ian ge 10,000 janggi tangani cholrangko songrango on·gen. Meghalaya-ko uni nitoanina mingsinga jeon chiringrang, a·brirang, chidarerang, ong·telaigipa samtangtang baksa melie ka·srokata. Ian songo donggiparangna dingtangmancha cholrangko on·gen, maina uamang songtangtangon janggi tangani cholrangko dakna man·gen aro jillarangona re·bae kam sandina neng·nikani dongjawa.
Minggipin mongsonggipa kam ka·aniara five star hotelrangko Shillong-o a·bachengatanian ong·a. Mingsinggipa Crowborough hotel-ko Shillong-ni jatchio ru·uta bilsirangna skang a·bachengate matchotatgija donchipaha. Meghalaya uni skanggipa five star hotel-ko man·na bilsi 36-na sengna nangaha. Mukul Sangma-ni dilgipa gitcham sorkari ru·utbata somoina sasono ong·genchimoba aro nisigipa pandemic dongjagenchimoba ia hotel-ko matchotatna man·jaha. MDA sorkari ia chu·sokanirangko man·aha ine bang·en rasong chaanirang gnang. Iarangna agreba, Courtyard by Mariott-koba mikkang jao oprake on·na sienga. Shillong ia five star hotelrangni donganichi bang·a namgnirangko mikkangchi man·anggen. Nambatani gadangrangko aditan ra·doaha, adita salrangna skang Meghalaya luxury tourism garirangko a·bachengataha. Ia scheme-ni gita, sorkari 50% tangka-paisarangchi dakchakaniko ge 50 garirangna on·enga jekon entrepreneur-rang ba bading-chiwalgiparang aro tourism cooperative society-rang chalaina gita man·gen.
Tourism-na bang·a daka-rikanirangkoba tariengaha, iarangan Meghalayako high-value tourism namgipa gadangni tourism-ona ong·atgen. Tourism department-ni aro Meghalayan Age-ni ong·atanggimin manianirangna biaptangni aro a·songni gipin bakrangni manderang gisik nanganiko mesokaha. Ia ja·ku de·anirang Meghalaya-na nitoaniko aro namdapaniko ra·baenga aro a·dok manderangni rona namnikgipa biap ong·baengaha.
Ia ja·ku de·anirangko ru·uta salrangna mikkangchina dakaha, aro iarangna kam ka·anirangko dontonggija dakangkuna nanga aro departmentko da·o dakenga gitan dilna nanga. Meghalaya-ni tourism janggi tangani cholrangko bikotna bang·en cholrang donga, mongsongbate Meghalaya-ni chadamberangna bikotkugija aro jakkalkugija bang·a cholrang dongengkua.