TURA: Meghalaya aro Assam a·dokni simarango meligrikna man·jaenggipa biaprango tom·tomaniko ra·bapilna aro a·dok damgnini gisepo meligrikaniko ra·bapilna gita a·dokni Chief Minister Conrad Sangma, adita salrangna skang songbadrango ku·rachakaniko on·atani ja·man, a·dok damgnini gisepo meligrikna man·jaenggipa dam 12 jolrango maming bak dongpagijagipa song damgittamkoba Assam-o napatahani gimin jegale Sukrobar salo, Association for Democracy & Empowerment (ADE), a·dokni Chief Minister Conrad K Sangma-na sedoataha.
A·dok damgnini gisepo meligrikna man·jaenggipa dam 12 jolrango tom·tomaniko aro meligrikaniko ra·bana kamrangko ka·engani gimin a·dok sorkariko mittelpilangengon, ia dam 12 jolrango maming nangegijagipa songrang, jekai Malangkona Joypur, Malangkona Salbari aro Malangkona Huhuapara songrangko Meghalaya a·dokoniko watchanggale Assam a·doko napatskaaha ine ADE-ni president Dalseng Bira Ch Momin, suk ong·gijaniko parakataha.
“Ia songrangode maming so·sojengjeng ong·ani aro meligrikgijanirangan dongjachim aro ia songni manderangba chengonin Meghalaya a·dokni manderang gitan songdong a·chatokpaengachim. Malangkona jolko chengonin Nongbak Sangma-ni a·king ine ma·sibaaha aro ia jolrangko British sorkarian Sixth Schedule-ni ning·o parakmanahani gimin ia jolrangko Meghalaya a·dok ning·on man·na nanga. Indide ia songrangkoa maini gimin Assam-na on·ataha ma ning·in ning·in manderangni ma·sigijagipa maiba kamrang dongama?” ine Momin sing·doataha.
2022 bilsini March jaonin dingtang dingtang dolrang, ia MoU-ko jegale, sorkarini tik ka·giminko ra·pilchina mol·molahachim ine janapatengon, NGO-rangni mol·molaniko Meghalaya sorkari knachakgija Assam sorkari baksa, MoU-o soi ka·grikaha ine ADE-ni president parakataha.
Shillong-o Garo Hills aro Khasi Hills-ni NGO-rang baksa tom·ani somoio ia kamrangko nipilna gita Chief Minister Conrad Sangma ku·rachakahachim indiba da·alonan ua maming ja·kurangko de·chipkuja ineba Momin parakataha.
