SHILLONG: Bangladeh-ona sriksrik cha·ue badingsrukanggipa lak 22 tangkani ba·rarangko (saree) BSF Meghalaya mija January 28 tariko Bangladesh baksa an·pachakgipa East Khasi Hills-ni sima ario ra·sekrikaha.
Lak 22 tangkani ba·rarangko cha·ue gate salangenggipa trak gariko 04 Bn BSF, Pyrdwah jolo chamchange rim·rikaha. Re·angenggipa gariko neng·takchina BSF-ni aganon, gariko salgipa driver, gariko buringchina salgalenba gale katangaha. Ra·sekgimin ba·arangko aro gariko BSF, Customs Pynursla-na pakwatataha.
Da·sikkari 2022 bilsio gimik gimang kror 1.2-na batpilgipa tangkani ba·a kancharangko BSF, International sima ario ra·sekrikaha ine BSF-ni koboro parakataha.
