SHILLONG: Ia chang Assembly election-ni ja·man doltangari sorkariko rikna miksongenga ine United Democratic Party (UDP)-ni agananiko National People’s Party (NPP) jegalatenba, ia election-o UDP, seat damdokna bate chena man·jawa ine parakatskaaha.
Re·baenggipa February-ni 27 tariko ong·atenggipa Assembly election-o bang·bata seat-rangkon chee an·tangari sorkariko rikgen ine UDP-ni a·kangenganiko a·dokni Deputy Chief Minister aro NPP-ni national vice president Prestone Tynsong jegalatenba UDP seat damdokna bate chena man·jawa ine parakataha.
Meghalaya Legislative Assembly-ni gimik dam 60 seat-rangoni dam 33-ko chee, NPP doltangari sorkariko rikna man·aigen ineba Tynsong a·kangataha.
Tynsong-ni parakatani gitade, ia election-o NPP, Khasi aro Jaintia Hills jolrangoniko dam 19 aro Garo Hills-oniko dam 14 seat-rangko chena ka·dongenga.
“Election-ni ja·man a·dokni manderangko dilna gita chinga Secretariat-ko jako ra·piltaigen,” ine Tynsong aganaha.
A·dok gimikni dam 31 seat-rangko chegen ine UDP-ni a·kangenganiko jegalatengon, UDP-ko bikotdilchenggipa membor-rangoni saksa Bindo Mathew Lanong-an ong·kate UDP (Original)-ko bikotenga ong·ode maikai UDP-ni dilgiparang indita seat-rangko chena ka·dongenga ine NPP-ni national vice president sing·doataha.
“UDP-ni indita seat-rangko cheani cholkon anga an·tangde nikatjaenga. Angni niksamsoani gitade, uamangGaro Hills-ode seat damsakoba chejawa aro Khasi-Jaintia Hills jolrangoba damdokna bate seat-rangko chejawa,” ine Tynsong aganaha.
Batanggimin bilsibongani gisepo NPP-chi dilgipa MDA sorkari, bilsi 50-na namatchipna man·gijagipa kamrangkon jako ra·e namatna jotton ka·aha ineba ua aganaha.
“Assam aro Meghalaya a·dokni simarango ong·enggipa golmalrangko darang sorkarian jako ra·na pa·chipjaha aro iako chingni sorkari namatna gita jako ra·chengaha,” ine Tynsong parakataha.
Assam aro Meghalaya a·dokni gisepo soi ka·grikgipa MoU-ko ra·galpilna gita TMC-ni ku·rachakani gimin janapatengon, uamangko a·dokni manderang seokchenggenma ine NPP-ni dilgipa sing·doataha.
