TURA: All India Hajong Welfare Association aro Meghalaya Hajong Welfare Association-ni chang 13-gipa joint conference ba tom·bimonganiko re·anggipa January 27 tarikoni 29 tarikona South West Garo Hills a·jani Tangabari songo ong·atangaha.
Ia tom·bimongani bon·kamgipa salo, a·dokni Chief Minister Conrad K Sangma-ba dongpae bak ra·angaha aro tom·anio ua jinmana aganprakangengon, mikkangchi chadamberangba jatni daka rikanirangko gamchate ra·angkuna aro ripinge rakkiangkuna gita dakmesokgiparang ong·china tom·anio bak ra·gipa manderangko didiangaha.
Meghalaya a·doko dingtang dingtang jatrang meli nangrime janggi tangenga ine janapatengon, jatni daka rikanio aro an·tangtangni jatna rasong chagiparang ong·china ua manderangko didiangaha.
“An·chingni Hajong jong-ada no-abirangba chengonin Garo Hills-o songdong a·chabagiparang ong·e mongsonggipa bakan ong·a. Da·alo ia tom·bimonganio ong·pana man·ahani gimin aro na·simangni dingtangmanchagipa daka rikanirangko nike ra·pana man·ahani gimin anga namen katchabea,” ine Sangma aganaha.
