SHILLONG : Voice of the People’s Party (VPP) ni dilgipa Adelbert Nongrumni aganani gitade bebegita uni party Assembly election-o cheaniko man·e sorkariko rikna man·ode NPP-chi dilenggipa MDA sorkarini kosako pilak kam ka·anirango tik onggijanirangna aro tol·gipa pilak kamrangna CBI chi sandirikkotanirangko daken ine aganaha.
Butbar salo Shillong Times-ni kobor ra·timgiparangni sing·anina agananiko dakmitingo ua aganaha, dingtang dingtang kam ka·anirango aro pilak tol·gipa kamrangko ka·enggiparangni kosako niam gita sandianirangko dakchongmotgen.
“Chinga ia a·selni bidingo namen dal·e ra·a ian election-na mangmangsan dakjaenga, indiba ian bang·a tol·pinnikgipa aro kam ka·anirango tik ong·gijagiparangni kosako niam gita sandianiko dakgen” ine gitcham legislator Nongrum aganaha.
Uni aganani gitade bang·bata a·songni manderangan ia tol·pinnikgipa aro tik ong·gijagipa kamrangko ma·sina gita sikenga, jedake merong palsrukani, MeECL-ni tik ong·gijagipa kamrang, Saubhagya scheme, smart meters aro niamgri koelarangko bikote palsrukanirangko dakani bidingo.
VPP-ni dilgipa indakeba janapatjolaha batanggipa bilsio Covid-19-o pangchake tangka paisarangko jakalani bidingoba name sandirikkotaniko dakna nangenga, maina Covid-19 o pangchake sorkari bang·a tangka paisarangko jakkalahachim. Ua indakeba agandapaha VPP sorkariko rikna gita man·genchim ong·ode maming dakeba tangka paisarangko skatang jakkaljawa indiba corruption free sorkariko rikgen.
Uni aganani gitade maming saloba dingtang dingtang department-rango dongenggipa kamrangna seoakaniko dakanio maming saloba mikkang niteaniko dakjawa, MPSC aro dingtang dingtang district selection committee-ni kamrangna seokanioba kakketko dake manderangni nikanio seokgen.
“Chinga dingtang dingtang sorkarini kamrangna seokanio maming saloba political dilgiparangni mikkang nitee kam ka·aniko nikna gita sikja” ine ua bon·kame agandapaha.
