SHILLONG: Batanggimin bilsi 45-o Meghalaya-o maming namroro-silroroani dongja ine Chief Minister aro NPP president Conrad Sangma-ni aganani salsa ja·mano, Purno A Sangma sagide Meghalaya-na maiba namdapaniko dakama mamingkon daka dongja ine AICC, chief minister-ko sing·doa gnang matnangdoatskaaha.
AICC media coordinator, Bobbeeta Sharma, CM-ni kattako janape uni pagipa sagi MP aro Union Minister ong·achim uaba Meghalaya-na mamingkon daka dongja ine aganaha.
“1988-1990 bilsirangni gisepo uni pagipa sagi Purna Sangma Meghalaya-ni CM ong·achim Meghalaya-o maming namdapaniko dakako nika dongja chinga Sangma-ko sing·na ska?
“”Mai kattako CM agana jotton ka·enga? Congress-ni mande ong·achim uni pagipa maikoba chu·sokatama? Purno Sangma sagi ua bilsirango Meghalaya-ni namroro-silroroanina maming kamko ka·a dongja,’’ Sharma sing·doaha.
Batanggimin bilsi 45 bilsirango Meghalaya-o maming namdapanikon nika dongja, uni pagipa mamingkon dakangjasan ong·aia indiba 1972 bilsio Congress party-na agre darangba Meghalaya a·dokko jakgitel man·e on·gipa dongja uko CM gisik ra·na nangchongmota, AICC aganaha.
Meghalaya-ni manderangna dangdike on·a chol man·ako jakkalsretanina Chief Minister-ko matnange namroro-silroroanina kamrangko ka·ani pal batesa MDA memborrang baksa cha·bok-rusiani gitokkolona sokdopilaha. Da·o rikenggipa Assembly buildingni protchong be·gruanio daito ong·gipa engineer-na tikkitko on·anina AICC, NPP-ko matnangaha.
“Namgija dakgipako sasti on·ani pal batesa MDA sorkari una namgniko on·skaengako nikna gita man·enga. Indake cha·bok-rusigipa manderang baksa uamangni chakpaani sakkiko mesokenga,” ua aganaha.
NPP-chi dilenggipa MDA cha·bok-rusiaoniko chel·chakaniko man·asanmang BJP-ni dakchakaniko ra·enga, matnangangkuaha. Ampareen Lyngdoh-ni NPP-o napani a·selko party sing·doe ua CBO-chi sandianiko man·engani a·selo NPP-o napaha, AICC aganaha.
Congress party-ko wate TMC-o nape uni janggi tanganio ua dal·bea gualaniko dakaha, TMC dilgipa Mukul Sangma-ko AICC watjawa ine aganaha.
Purno Sangma sagiba uni party-ko wate Trinamool Congrees-o napaha indiba uamangni ripeng ong·ani baikamjaha, TMC party-ko Meghalaya-o ra·chakja uamangko a·paloni party inesa ra·enga, party aganaha.
“Dr Mukul Sangma gipinoni party-o nape uni gamko gimatenga aro Meghalaya-ni manderangni chanchiako TMC ra·chakjenga aro simsakjaenga. BJP-ko a·palaoni ine ra·enga uandake TMC-koba gipinoni ine chanenga,’’ uamang aganaha.
