SHILLONG: Dadenggreni da·oni MLA James Sangma MLA ong·na kraja maina ua pilak kamrangkon chu·sokatna man·jaha ine Dadenggre constituency-ni gitcham Congress dilgipa Augustine D. Marak aganaha, jean Mongolbaro TMC-ona ja·napeaha.
“Conrad-ni election-o chakatjani gimin James-an CM-na kragipa ong·gen ine angan James Sangma-ko election-o cheatna gita kam ka·dilgipachim. Dadenggreni MLA, CM ong·ode chingnan rasong ong·gen ine chinga chanchiachim. Indiba sorkariko rikani ja·mande James-na jedakgipa portfolio-ko on·oba maming kamkon ka·jaha,” Augustine aganaha.
Augustine, jean dingtang dingtang political party-rangni sak 200 mang manderang baksa TMC-o ja·napeahachim, “Iani giminan anga, James-ko MLA ong·na krajaha ine agna. Da·oni manderangni gisikrango niatengon, James-ko aro manderangko uni jakkalako manderang namniktokjaha ine nikna man·a,’’ Marak aganaha.
Election-o susaoni ong·katani ja·man Augustine D Marak Meghalaya TMC-na chakpana gita TMC-o napeaha.
Meghalaya TMC-o uni napani bidingo aganengon, “Congress aro TMC-ni gisepo vote-rang sualgen unode chena kragijagipanasa namgni ong·gnok ingipa kattarang ong·kataha. Unigiminsa Garo Hills-ko galchipani gimin anga Vincent Pala-ko watgalaha. Kolkata-ni manderangan baditaba changna wenbaaha indiba Pala, Shillong-onin changsaba wenbaja,” ua aganaha.
Komigipa ba bilgrigiparangni bilna chakatgipa ong·ani gimin Trinamool Congress-ko mittele aganengon, “Jensomoio Mother Teresa charity [Missionaries of Charity]-na chamatgipa fund-ko Ma·mong champengatahachim, uno chingni Chief Minister jripjrip dongaia. Na·simangni MLA James Sangma ba MP Agatha Sangmaba ku·sa kattakoba aganjaha. Indiba West Bengal-ni Trinamool MP-rang Mahua Moitra aro Derek O’Brien mangsa an·chingni palo aganchakaha” ine Augustine D Marak aganaha.
Tom·anio, Phulbari aro Tikrikilla District convenor in charge Polmonsing Sangma, Dadenggre TMC Block Committee advisor Mickel G Momin, Meghalaya TMC Working President, Dadenggre Boaz Marak, Meghalaya TMC General Secretary, Dadenggre Levastone T Sangma aro Ex-MDC Jengjal, bakko ra·angaha.
