SHILLONG: Re·baenggipa February-ni 27 tariko ong·atenggipa Assembly election-na National People’s Party (NPP)-ni ‘People’s Document – Vision 2023-28’ election manifesto-ko Sukrobar salo, NPP-ni national president Conrad K Sangma, Jowai-o oprake on·angaha aro ia NPP-ni election manifesto-ko oprake on·anganio a·dokni Deputy Chief Minister Prestone Tynsong, Cabinet Minister Sniawbhalang Dhar, Raliang MLA Comingone Ymbon, Jowai MLA Wailaimiki Shylla, East Shillong-ni NPP candidate Ampareen Lyngdoh aro gipin dilgiparangba dongpae bak ra·angtokaha.
Ia election manifesto ba election-na ku·rachakanirangko seani bidingo NPP-ni national president Conrad Sangma, jinmana parakatengon, ia lekkao 2023 bilsioni 2028 bilsiona Meghalaya a·dokni manderangna NPP-ni chu·sokate on·na miksongenggipa kamrangni gimin seaha aro ian mongsongbate a·dokni chadamberangna kamrangko aro janggi tangani cholrangko bikote on·an baksana game ge·e cha·giparangna aro songadam nokadamrango donggipa manderangna dakchakanirangko on·na miksongenggipa kamrangni gimin ong·a ine parakataha.
Batanggimin bilsi bongani gisepo NPP-chi dilanggipa a·dok sorkarini chu·sokate on·gipa kamrangni gimin janapatengon, mikkangchi a·doko songdongenggipa manderangna nambata songsalko ong·atna ia sorkarini bilakgipa pangchakaniko songani bidingo ia election manifesto-o janapaha ine Sangma parakataha.
2023 bilsioni 2028 bilsiona a·dokni chadamberangna ku·rachakenggipa kamrangni gimin janapatengon, kamgri ong·e dongenggipa chadamberangna lak 5 kamrangko ong·katate on·an baksana dingtang dingtang janggi tangani cholrangko on·na gita ia NPP-ni election manifesto-o ku·rachakaniko on·enga ine NPP-ni national president parakataha.
“Chadamberangni changa sapanirangko namdapatna gita dingtang dingtang cholrangko on·ani giminba chinga ia election manifesto-o janapaha,” ine Sangma aganaha.
NPP-ni national president aro a·dokni Chief Minister-ni parakatani gitade, a·dokni songantion sorkarini kamrangko on·na gita ge 1000 Chief Minister’s Facilitation Centre-rangko kulina, game ge·e cha·enggipa manderangna sorkarini ra·gatgipa FOCUS aro FOCUS Plus program-rangko jako ra·angkuna gitaba NPP-ni election manifesto-o ku·rachakanirangko on·aha.
Iana agreba, songantionan rama jal·langrangko tarie on·na, internet-rangko on·na, IT Park-rangko kulina, nokantionan chi pipe-rangko sale on·na, an·seng baljokani kamrangko namdapatna aro da·o dongenggipa scheme-rangko manderangni namgnina nambatate jako ra·angkuna gitaba NPP-ni election manifesto-o janapaha ineba Sangma parakataha.
