SHILLONG: Meghalaya a·doko Assembly election-ko ong·atna siengon, Ri Bhoi a·jani police-rang, gong lak 2.48-mang ong·gipa Fake Indian Currency Notes (FICN) ba tol·e tarigipa tangkarangko, Mizoram a·dokni mande saksaoniko man·aha.
Kobor on·timgiparangni u·iatani gitade, ia mandeni bidingo koborko man·soani ja·man Ri Bhoi a·jani police-rang, Sukrobar attamo Umsning bibrao re·ruraenggipa manderangko nirikkina a·bachengataha. Attamni 7:25 bajimango police-rang, taxi gari bolsa aro scooty bolsako ua biapo rim·soaha aro ia gari bolgnini manderangko rim·aha.
Ia taxi aro scooty-o re·bagipa manderangoniko am·sandion, Mizoram a·dokni Aizawl songjinmao donggipa saksa Lalnungtluangi minggipa Mandeni jolonggaoniko tol·e tarigipa gong 2,48,500 tangkarangko man·aha.
Police-rangni rim·gipa gari bolgnio re·bagipa manderang ia tangkarangko on·grikna gita siengachim ine kobor on·aha.
Ia manderangoniko police-rang, mobile phone ge 4 aro ATM card king 3-koba rim·aha.
