SHILLONG: A·dokni manderangna ku·mikchetanirangko NPP-chi dilanggipa MDA sorkari, chu·sokatna man·jaha ine Trinamool Congress (TMC)-ni dilgipa aro a·dokni gitcham Chief Minister Mukul Sangma matnangataha.
Sangma-ni parakatani gitade, a·doko an·seng baljokani kamrangko aro lekka porani gadangko tang·doatna gita MDA sorkari ku·rachakahaoba ia kamrangko chu·sokatna man·jaha aro a·doko chadamberangni kam gri ong·e dongna nangenganikoba namatna man·jaha.
“Namroro silroroani kamrangko angni somoion a·bachengatahachim indiba batanggimin bilsi bongani gisepo ia kamrangko matchotatchipna man·jaha aro bangbang ong·e dongenggiparangkoba gapatna man·jaha. Hajalni hajal skigiparangnaba ia sorkari kamrangko on·chipjaha aro uandaken skigiparang bang·a neng·nikanirangko chagrongna nangtokaha,” ine Sangma, South West Garo Hills a·jani Ampati TMC office-o jinma tom·bimonganiko ong·atanio aganaha.
Tangka paisarangko jakkalsretaha ine MDA sorkariko matnangatengon, medical college-na gimik gong kror 172-ko man·soahaoba gong kror 62-kosan jakkalaiaha ine TMC-ni dilgipa parakataha.
“Bangki tangkarangni giminde maming janapanian dongsrangjaha,” ine ua aganaha.
Medical college-rangkoa bida budiko on·namangmangsan kulia ong·ja indiba sagiparangko sanna banna gitaba kulia ine janapatengon, “Medical college-rangode specialist-rang baksana super specialist professor-rangba donga,” ine Sangma parakataha.
“An·chingni sanchakram biaprango CT scan aro MRI dakani cholrang donggenchimoba an·ching sanna bananirangko ra·na gita Goalpara, Guwahati aro uandakgipa dingtang dingtang biaprangona re·angna nangtokenga. An·chingni A·chik a·songo manderang indita man·e cha·giparang dongama?” ine Sangma sing·doangaha.
Bida budirangko man·ani ja·manoba bang·a chadamberangan kamrangko ka·e cha·na cholrangko man·jaengani giminba ua NPP-chi dilgipa sorkariko matnange aganangaha.