SHILLONG: Re·baenggipa February 27 tariko ong·atenggipa Meghalaya Legislative Assembly election-o National People’s Party (NPP), dam 33 ba 34 seat-rangkode chetelgen ine Sonibar salo, NPP-ni national vice president aro a·dokni Deputy Chief Minister Prestone Tynsong, an·tangni ka·dongchakenganiko parakattaiaha.
Uo chief minister ong·na skanirang dongjama ine sing·anina aganchakaniko on·angengon, “Anga CM ong·na sikja ine basakoba aganahama? Da·o dipet chinga dolongko batangkuengmiting aro chinga Khasi-Jaintia baksana Garo Hills jol gimikon dam 33 ba 34 seat-rangko cheahaon, seokako man·gimin dilgiparang an·tangtangni dilgiparangko seokskagen,” ine Tynsong parakataha.
BJP-na balwarang nambatenga ine agananiko jegalatengon, ian ‘ka·singipa’ balwasan ong·aia ine Tynsong parakataha.
Election-o vote-rang priprae bon·gen ine agananiko jegalatskaengon, ia changoba a·dokni manderang NPP-ko bilona seoktaigen ine NPP-ni national vice president, an·tangni ka·dongchakenganiko parakataha.
Inner Line Permit-na dabianiko chu·sokatna man·kujaengani gimin janapatengon, ILP-ni bidingo NPP-ni election manifesto-oba janapmanaha aro iani bidingo uamang ma·mong sorkari baksa agangrikangkugen ine Tynsong parakataha.
Bilsigni atamangna COVID sajinmani a·sel NPP-chi dilanggipa sorkari, kamrangko name ka·na man·jahani gimin ILP aro Khasi/Garo ku·sikrangko Eighth Schedule-o chapatchina dabianiko chu·sokatna man·jaha ineba Tynsong parakataha.
Assam aro Meghalaya a·dokni simarango ong·enggipa golmalrangko namatna gita a·dok damgnini gisepo soi ka·grikgipa MoU-ko ra·galpilna Trinamool Congress (TMC)-ni ku·rachakenggipani bidingo janapatskaengon, ian TMC-ni ia neng·nikaniko namatna gisik nanggijaniko mesokani ong·enga ine a·dokni Deputy Chief Minister parakataha.
Opposition TMC-ni dilgipa Mukul Sangma, constituency damgnioni susae, ia biap damgnion chegenchimoba biap damsakode wattelna nangaigen aro iani bidingo manderang uo ka·dongna man·jawaha ineba Tynsong parakataha.
NPP sorkarini kosako tangka paisa jakkalsretanina aro ong·gija kamrangna matnanganirangko jegalatengon, matnangenggipa manderango maiba sakkirang donggenchimode, ainni gita ja·kuko de·na bil donga ine Tynsong parakataha.
