TURA: A·dokni manderangna mesokna gita NPP-chi dilgipa MDA sorkario maming chu·sokatani kamrang dongja ine Robibar salo, South Tura constituency-ni Trinamool Congress (TMC) candidate Richard Marak matnangataha.
An·tangtangni chu·sokatgipa kamrangko mesokna gita NPP sorkario mamingan dongja ine matnangatengon, NPP-ni dilgiparang pangnan TMC-ni kamrangkosa nirikkie dongengani gimin a·dokni manderangnade somoian dongja ine Marak parakataha.
Mukul Sangma-ni kamrangko sing·doanichi NPP, a·dokni manderangko dilsretna jotton ka·enga ineba Marak matnangataha.
“Meghalaya a·dokni manderangna nangchongmotgipa kamrangkon NPP chu·sokate on·na man·jaha ine anga da·alo uamangna gisik ra·atpilaniko on·na sikenga. Batanggimin bilsi bongani gisepo a·dokni manderang maming namroro silroroani gri andalaosa dongna nangtokaha,” ine South Tura constituency-o a·dokni chief minister aro NPP-ni candidate Conrad Sangma baksa susaenggipa TMC-ni candidate parakataha.
NPP-chi dilgipa sorkarini somoio, Meghalaya a·dokni manderangna neng·nikanirangkosa ra·baaha aro skigiparangba neng·nikanirangko chagrongna nangtokaha ineba Marak parakataha.
“Skigiparangko kamo ra·pilchina dabie ramarango re·jomanirangko an·ching pilakan nikna man·aha. Skigiparangna ia sorkari maiko dakaha? Batesa uamangko gol·dikrangchi dokaha aro tear gas-rangko godapaha. Namroro silroroaniko ra·baaha ine gangbo dakenggipa NPP sorkarini asol mikkangde iasa,” ine Marak parakataha.
NPP sorkari, manderangna ku·mikchetatangkon chu·sokatna man·jaha ine matnangatengon, ritchani ritcha chadamberang maming janggi tangani cholrangko man·jaengani ia sorkarini kosako jegalanirangko dakaha ine TMC-ni dilgipa parakataha.
“NPP sorkari, kamgri ong·e dongenggipa chadamberangna maiko dakaha? Uamang sorkarini aganchakaniko bi·namangmangba bil dongjama?” ine Marak sing·doataha.
NPP-chi dilgipa MDA sorkarini somoio dingtang dingtang neng·nikanirangko chagrongna nangahaoba TMC, a·dokni manderang baksa ong·aha ineba Marak parakataha.
“Chingni manderangna on·enggipa ming 10 ku·mikchetanirangara a·doko namroro silroroaniko ra·bana manderangni nangchongmotenggipa kamrangan ong·a. A·dok gimikon TMC-ni tom·bimonganirango hajalni hajal manderangni bak ra·enganiko nike NPP kenjagokengaha. Chingni manderangna ku·rachakenggipa WE Card aro MYE Card-rangara chingni ka·donganiko mesokanian ong·enga indiba NPP-ni bangbanggipa kattarangde an·chingo biap dongja,” ine Marak aganaha.