AMPATI: Meghalaya a·doko pekatgipa sam jakkalani aro badingsrukaniko bon·atna gita rakbee kamrangko ka·engon, re·anggipa Sonibar attamo, South West Garo Hills a·jani police dol, gong lak 2.36-ni gram 11-mang ong·gipa ‘heroin’ samrangko rim·na man·aha.
Police-rangni u·iatani gitade, koborko man·soani ja·mano Monabari outpost-ni police-rang, Tura Dakopgre-oni Chebat B Sangma aro Ampati Songma-oni Dechangra D Sangma minggipa mande sakgniko rim·na man·aha aro ia manderangoniko gong 2,36,093-ni gram 11 ong·gipa heroin samrangko man·aha.
Ia mande sakgnioniko police-rang, X-pulse motorbike bolsa, mobile phone ge 2, ID card-rang aro gong 900/- tangkarangkoba rim·aha.
Iani bidingo police-rang, NDPS Act-ni ning·o mokordomako segatenba, sandirokanirangko dakengkua ine kobor on·aha.