SHILLONG: Ia chang Assembly election-o seat-rangko bang·bate chegenchimode gital sorkariko rikanio United Democratic Party (UDP)-ni chief minister ong·ani cholrang donga ine Sombar salo, UDP-ni general secretary Jemino Mawthoh, an·tangni ka·dongchakenganiko parakataha.
“Chinga bang·bate seat-rangko chea ong·ode gital chief minister UDP-onin ong·gen,” ine Mawthoh, Sombar salo, Nongthymmai constituency-oni susana an·tangni nomination-ko file ka·angani ja·man kobor ra·timgiparangna parakataha.
Election-ni ja·man National People’s Party (NPP) baksa bakrimani bidingo sing·anina aganchakaniko on·angengon, iani bidingo uamang nichengna nangkugen aro da·o dipet name aganna man·kujawa ine UDP-ni general secretary parakataha.
Ia chang a·dokni manderang NPP aro TMC-ko ra·chaktokjaengani gimin uamang bang·bate seat-rangko chena ka·dongenga ineba Mawthoh parakataha.
“Chinga bang·bate seat-rangko chena man·jagenchimoba sorkariko dilna man·na gita dolsanchi dal·batgipa party ong·na nangnikenga,” ine UDP-ni general secretary aganaha.
Mawthoh-ni parakatani gitade, bakrime rikgipa sorkariko gipin dolrang dilgenchimode, pangnan uandakgipa dolrang gipin dolrangkode nichanggalronga ine uamang nikmanaha.
UDP-ko bikotdilchenggiparangoni membor saksa Bindo Lanong-ko uamang nichanggala ine matnanganikoba ua jegalataha aro da·oba uamang una mande ra·aniko dongkuenga ine Mawthoh parakataha.
Skang somoirango Lanong, East Shillong constituency-osa susarongani gimin East Shillong constituency-on susataichina gitasa UDP-ni dilgiparang Lanong-ko aganahachim ineba Mawthoh talataniko on·angaha.
Nongkrem constituency-oni susana gita UDP-ni tikitko Lambor Malngiang-na on·aniara UDP-ni state election committee-ni tik ka·anisa ong·a ineba ua parakataha.
