TURA: South Garo Hills a·jao donggipa 60-Baghmara constituency-o National People’s Party (NPP)-ni candidate ong·e susaenggipa Satto R Marak-na a·dokni Chief Minister aro NPP-ni national president Conrad K Sangma, Sombar attamonin a·bachenge salgnina campaign ka·angaha.
Baghmara constituency-ni ning·o donggipa Sibbari-oni a·bachenge NPP-ni national president, Malikona, Demplipara aro Lower Gasuapara jolrango, NPP-ni candidate-na campaign ka·angaha.
Ia songrango aro dingtang dingtang gittimrango songdongenggipa manderangna a·dokni Chief Minister aro NPP-ni national president aganprakangengon, 2018 bilsina skangde pilak sorkarirangan South Garo Hills a·jaoko nichanggalahani a·sel mamingni gitan namroro silroroaniko nikna man·jaha indiba 2018 bilsio NPP-ni dilanichi gital sorkariko rika intalan uko man·chape dingtang dingtang minister-rang, South Garo Hills a·jaona wenbarongaha aro bang·en namdapatani kamrangko ka·na a·bachengaha ine parakataha.
Ia 2023 bilsioba NPP-ko seoktaigenchimode, South Garo Hills a·jako namdapatangkuna gita NPP-ni dilgiparang rakbate kamrangko ka·anggen ineba Sangma ku·rachakaniko on·angaha.
