SHILLONG: National People’s Party (NPP)-ni kamtango ‘gangbo’ dakani a·selan ia Assembly election-o amchepako man·na sienga ine Mongolbar salo, Meghalaya a·dokni Bharatiya Janata Party (BJP) parakatenba, gipin dolrangni result-rangko tosusae roana bate an·tangni biapkon jokatchina ine a·dokni chief minister aro NPP-ni national president Conrad K Sangma-na mikrakataniko on·angaha.
“Meghalaya a·doko tangka paisa jakkalsretani gital bewalko ra·gatani giminan NPP-ko Meghalaya a·dokni manderangni gisepo mingsing minggamenga. NPP-ni gangbo dakani a·selan ia election-o uamang amchepako man·na sienga. Songadam nokadamrangona ramarangko tariangani pal NPP-ni dilgiparang, noktangtangonasa gari ramarangko tarienga, ramarangko teng·atani pal uamang noktangtangosa nitogipa teng·atanirangko tarienga aro a·dokko rikani pal uamang an·tangtangnasa gam-jinrangko chimongskaaha,” ine Meghalaya BJP-ni dilgiparang parakataha.
NPP-ni kamko manderang nie dongenga aro ia election-o uamangna nanga gita aganchakaniko on·gen ineba BJP parakataha.
“Manderang an·tangtangni vote-rangko nisigalna nangja ine agananichi Conrad Sangma ong·akon aganaha aro uni agana gita balwarangba balenga. Indiba ia changode a·dokni manderang ku·rachakatangko chu·sokatgipa BJP sorkarikosa seokna tik ka·manaha aro bilsibongani ja·man manderangko gital dake tol·nagipa dilgiparangko seokjana tik ka·manaha,” ine Meghalaya BJP parakataha.