SHILLONG: Mongolbar walo, West Garo Hills a·jani Phulbari Assembly constituency-o dolgni political dolrangna kamko ka·enggipa manderangni gisepo dinggrikaniko District Election Officer (DEO)-ni report on·ani ja·man, mikkangchi iandakgipa a·selrangko champengna gita pilak biaprangon chel·chakgipa sipai dolrangko bilakbatataha.
Ia jolrangona BDO-rang baksana SDO aro SDPO-rangko nirokna gita watataha aro ia jolrango so·sojengjeng ong·anirangko chel·chakna gita ma·mongoni watatgipa central armed paramilitary force (CAPF)-rangko donataha ine kobor on·aha.
Election-ni somoio so·sojengjeng ong·atna jotton ka·gipa manderangko CrPC-ni Section 107-ni ning·o rim·gen ineba Election official-rang mikrakataniko on·ataha.
West Garo Hills a·jani a·kawe jolgimikon dolgittam CAPF-rangko donataha ineba kobor on·aha.
West Garo Hills District Election Officer (DEO)-ni u·iatani gitade, Mongolbar walni 10:45 bajimango TMC aro NPP dolrangna kam ka·enggipa manderang, 46-Phulbari Assembly constituency-ni ning·o donggipa Charbatapara songo dinggrikahachim.
Ua somoio TMC-ni candidate aro gitcham MLA SG Esmatur Mominin baksana TMC-ni Moni Mondol, TMC-ni Bhuttu minggipa mande aro NPP-ni MDC Habibur Zaman-ba dongachim ine kobor on·aha.
Ia a·selni bidingo kobor man·soa bakan Phulbari Police Station-ni dolsa sipairang, ua biapona dariange ia a·selko namatpilna man·aha.
Ia a·sel ong·ani ja·mano saksku manderangko medical examination-na Phulbari CHC-ona watataha indiba porikka ra·ani ja·man uamang pilakkon watpilaha.
Saknaa man·gipa manderangoni saksa Nojrul Hoque minggipa mandede, uni micron sambao saknaaniko man·ahani gimin nambata sanna bananiko ra·china ku·pattianiko on·ataha.
Indake ong·engon, ia a·selni bidingo Charbatapara songni saksa Nozim Hussain minggipa mande FIR-ko ka·aha.
DEO-ni report on·ani gitade, ia song gita Habibur Zaman aro uni manderang jinma re·jomangengmiting somoio, TMC-na kam ka·enggipa mitam manderang uamangni Scorpio gariko nangataha aro uandaken dolgnini gisepo dinggrikna a·bachengahachim.