SHILLONG: Pynthorumkhrah-ni BJP legislator AL Hek-ni, an·tangni chief minister-ni post-na nichakengani parakani salgnini ja·mano, da·o dipetode BJP darangkoba CM-ni post-na miksongsoa dongkuja ine party koboro parakataha.
BJP, da·o dipetode darangkoba CM-ni post-na chanchisoa dongkuja ine state BJP president Ernest Mawrie talataniko on·angaha.
Mawrie-ni aganani gitade, party-ni niam gita, election-ni ja·mano seokatako man·gimin memborrang jinma tom·aniko ong·atenba unosa jinmani namnikako seokgen.
“Darangba an·tangko da·o dipetode CM candidate ine aganna man·kujawa maina election-ni ja·manosa dilgipako seokgen,” Mawrie aganaha.
Prime Minister Narendra Modi-ni wenbaanichi, BJP manderangko salbana man·gen ine namen ka·dongsoenggen ine ma·siatna man·a. Meghalaya-ni manderang, party-ni kamrangko nikatenba BJP-na indakpile kusi ong·beade ong·tokja gita dakani gimin party-na bilake ga·chate krengnade altua ong·ja gita nika. A·doko voter-rangko an·tangtangchi salna gita party-ni mongsonggipa dilgiparang jedake PM Modi, Amit Shah, Rajnath Singh, Smriti Irani aro Nitin Gadkari aro ma·mongni gipin gipin dilgiparangko campaign-na rimbanade jotton ka·enga.
Modi, re·baenggipa February 18 tariko Turao mingsa election rally-ko ka·nasienga aro uandake February 24-o Shillong-o roadshow dakangnasienga ine party koboro parakaha.
Unomitingo February 18 tarikoni Union Home Minister, Amit Shah aro party-ni mongsonggipa gipin dilgiparang a·doko campaign ka·chakatanggen ineba party koboro parakaha.
Party koboro janapani gitade Union Home Minister, Shillong-na agreba Raliang, Mawsynram aro Ranikor-oba campaign-rangko ka·angnaba donga.
