TURA: Bharatiya Janata Party (BJP) dolara, Kristian ba badiaba toromni kosako chakatgipa dol ong·ja indiba tangka paisa jakkalsretaniko namnikgijagipa dolsa ong·a ine Bristibar salo, South Tura constituency-ni BJP candidate Bernard N Marak parakataha.
BJP-ni election manifesto-o pilak jat aro toromni pilak gadangni manderangnan apsan cholrangko donaha ine janapatengon, ia pangchakanion BJP, songsalni pilak manderangonan sokatna gita man·aha ine Marak parakataha.
“Delhi-o BJP sorkarini program-rang aro miksonganirangara a·songni pilak manderangna aro a·doko songdongenggipa pilak manderangnan maming jat ba torom baseani gri sokatna tarigimin programrangsa ong·a aro ia kamrangko ka·anio BJP sorkari pilakni gitan aro mongsongbate kangal cholgrirangna aro ja·manchakenggipa manderangna chu·sokatna man·aha,” ine BJP candidate parakataha.
BJP-ko Kristianrangni kosako chakatgipa dol ine matnanganirangko jegalatengon, da·alona kingking darangba iani bidingo sakkirangko mesokna man·kuja ine Marak parakataha.
“Nagaland a·dokko toe agangenchimode ia a·dokara mongsongbate Kristianrangni songdong a·chagipa a·doksa ong·a indiba ia a·doko BJP sorkariko chalaienga. Nagaland a·doko BJP sorkariko chalaiengoba da·alona kingking Nagaland a·doko songdongenggipa manderangni neng·nikanirangko chagrongna nanganirangko an·ching nikna ba knasona man·kuja. Uni gimin BJP sorkari maming dakeba Nagaland a·doko songdongenggipa manderangni daka rikanirangko, janggi tangani bewalrangko aro cha·a ringani bewalrangko champengna jotton ka·a dongja. Kakketko agangenchimode Nagaland a·doko jatni daka rikanirangko aro niam retirangko Minority Affairs Ministry-ni ning·o bilakatna gitasa ma·mong sorkari kam ka·enga,” ine BJP-ni state vice president aro South Tura-ni candidate parakataha.
Meghalaya a·dokoba BJP, MDA sorkarini bak ong·paenga ine janapatengon, a·doko BJP-ba sorkarini bak ong·paengani giminsa ma·mongni dingtang dingtang project-rangko a·dokona man·baaha ine Marak parakataha.
“Meghalaya a·dokara Kristian a·doksa ong·a aro chingni pilak candidate-rangba Kristianrangan ong·a. Ia election-o BJP-ni candidate-rang chegenchimode uan Christian toromna man·dapanisa ong·gen aro mikkangchiba Kristianrangni neng·nikanirangko BJP MLA-rang, ma·mong sorkariona ra·anggen,” ine Marak parakataha.