SHILLONG: Re·baenggipa February-ni 27 tariko ong·atenggipa Meghalaya Legislative Assembly election-o susana nomination file ka·gipa candidate-rangoni darangba ra·pilgiparang dongjaha ine a·dokni Chief Electoral Officer (CEO) FR Kharkongor, Sukrobar attamo u·iataha.
Ia Assembly election-o susana gita nomination file ka·gipa candidate-rangna an·tangtangni nomination-rangko ra·pilani bon·kamgipa tarikara mijal February 10 tarik attam 3:00 bajiona ong·achim.
Indake ong·engon, nomination-ko ra·pilani bon·kamgipa somoionan darang candidate-rangan an·tangtangni nomination-ko ra·pilgiparang dongjahani gimin scrutiny ka·anio chu·sokgipa pilak candidate-rangan ia election-o susaanggnok ine Kharkongor parakataha.
Ia chang Meghalaya Assembly election-o susana gita a·dok gimikoni sak 379 candidate-rang nomination file ka·ahachim indiba sakbrikode uamangni lekkarangko nipilanio jegalahani gimin da·o sak 375 candidate-rang dongkuengachim.
Uandaken, nomination-ko ra·pilani bon·kamgipa somoiona kingkingan candidate-rang darangba ra·piljahani gimin da·o a·dok gimikni dam 60 constituency-rango sak 375 candidate-rang susaanggnok.
