WILLIAMNAGAR: East Garo Hills-ni District Election Officer (DEO) Jagdish Chelani, General Observer MK Haque aro Expenditure Observer T Ramalingam, Returning Officer-mang dongpaanio Williamnagar-ni Deputy Commissioner Office-ni Multipurpose Hall-o political dolrang election-o susaenggipa candidate-rangko grongaha.
Indake tom·anio, meeting-ni ming 30 agenda dongipao chanchirimaniko dakangaha. DEO, election-ni somoio Election Commission of India aro Model Code of Conduct (MCC)-ni niamko ja·rike, election-ko maming neng·nika gri tom·tome matchotangna man·a gita agan-ku·pat-tiaha. Iarangna agreba DEO, election-o susaeng-gipa candidate-rang aro election-o campaign ka·-enggiparangko gari aro helicopter-rangko jakkala-niko maiko dakna nanga nangja, iarangni gimin aganangaha. Indake ong·-engon Persons with Disabilities (PwDs) ba be·enni gita bilgrigipa dolrangna February 17 tarikoni postal ballot-ko jakkalanggen ineba jinmana u·iataha.
Iarangni gisepon General Observer, MK Abdul Haque, ‘political dolrang aro susaenggipa candidate-rangna East Garo Hills-na seokgipa election observer-rangni contact nombor-ko wataha ine u·iataha. Jedakode election-ni bidingo jedakgipa neng·nikarangko altubee election observer-rangna badi ka·na man·gen. Indake political dolrangko unbak-sana election chakateng-gipa candidate-rangko ECI-ni niamrangko ja·rikchina mol·molataha. Expenditure Observer, T Ramalingam, tom·anio Shadow Observation Register-ni gamchatani gimin u·iataha aro election result-ko parakatna sal 30 skangan political dol aro candidate-rangko bank account-ko on·china aro cVIGIL app-ko jakkalchina mol·molaha.
