SHILLONG: Meghalaya Assembly election-ko ong·atna da·o antignimangsan dongaiahaon, dingtang dingtang dolrangni gisepo chief minister-ni biapnaba susana a·bachengtokaha.
Chief minister-ni biapna United Democratic Party (UDP)-oniba a·kangna a·bachengahaon da·o Bharatiya Janata Party (BJP)-ni dilgiparangba CM-ni biapko an·tangtangan ra·e katna miksonganirang dongskaengaha.
BJP-ni dilgipa AL Hek-ni parakatani gitade, ia chango BJP skanggipa changna a·dokni pilak dam 60 seat-rangon susaenga aro ia changode BJP, bang·bata seat-rangkon chee sorkariko rikna ka·dongsoenga.
“Ia changode BJP-ni dilanichi sorkariko rikchongmotgen aro chief minister-ba BJP-onin ong·gen,” ine Hek parakataha.
CM-ni biapna ua an·tangba susaengama ine sing·on, CM-ni biapko jeba cheangchina indiba uan BJP-ni ong·na nanga ine Hek parakatskaaha.
Adita salrangna skangsan ua, a·dokni gital chief minister BJP-oni ong·genchimode ua an·tangan ong·gen ine Hek aganskaahachim.
Man·a dipet BJP, seat-rangko chena krengenga ine janapatengon, ia changode BJP bang·bate seat-rangko cheenba manderangna aiao inmananiko ra·bagen ine BJP-ni dilgipa parakataha.
Prime Minister Narendra Modi-ni ra·gate on·gipa dingtang dingtang scheme-rangni gimin janapatengon, a·songni Prime Minister, pangnan kangal cholgrirangna chanchie uamangni janggi tanganiko namdapatna jotton ka·enga ine Hek parakataha.
BJP-ni national general secretary Tarun Chugh baksana BJP-ni adita sak dilgiparang, Shillong-ni Archbishop Victor Lyngdoh-ko grongaha ineba ua parakataha.
Shillong-ni Archbishop-ko BJP dilgiparangni grongani miksonganiara, PM Modi darang jat ba toromni gisepo mikkang niteani gri kamko ka·enga ine talataniko on·na ong·a ineba Hek parakataha.
